Qaraǵandy qalasy ortalyq meshitiniń imamy Ómirzaq Bekqojaǵa tutqynǵa alynǵan balany qutqarǵany úshin IIM belgisi bar qolsaǵat tabys etildi, dep habarlaidy "Ult aqparat".
Qaraǵandy oblysynyń politsiia departamentinde vedomstvonyń jedel-qyzmettik jumysynyń qorytyndysyn shyǵarý boiynsha keńeitilgen keńes ótti.
Jiyn barysynda Qaraǵandy oblysy PD bastyǵynyń mindetin atqarýshy Erlan Faizýllin Ortalyq meshit imamy Ómirzaq Bekqojany saltanatty túrde marapattap, basshylyqtyń atynan shuǵyl jaǵdaida tutqyndy qutqarýda joǵary azamattyq ustanymyn tanytyp, politseilerge kómek kórsetkeni úshin alǵys aitty.
Esterińizge sala keteiik, 17 sáýir kúni 34 jastaǵy qala turǵyny otbasylyq janjaldan keiin týystaryn páterden qýyp shyǵyp, kishkentai qyzyn kepilge alǵan bolatyn. Politseiler qaýipsizdik úshin qalanyń barlyq shuǵyl qyzmetin jumyldyrdy. PD basshylyǵy kepilge alynǵan búldirshindi qutqarý úshin shuǵyl operatsiia júrgizdi. Uzaqmerzimdi kelissóz barysynda arnaiy bólimsheniń politseileri imamnyń kómegimen qalanyń ortalyq meshitinde qylmyskerdi zalalsyzdandyryp, tutqynǵa alynǵan balany qutqardy. Operatsiia kezinde eshkim zardap shekken joq.
Aita ketý kerek, ótken jyly qoǵamdaǵy keleńsizdikterge nemquraily qaramaityn azamattardyń kómegimen 31 qylmys ashylyp, 480-den astam quqyq buzýshylyq anyqtaldy. Politsiia departamentiniń basshylyǵy 35 azamatty gramotamen marapattaǵan.
