Qaraǵandy oblysynda qazaq tili men ádebieti páni muǵalimderiniń aimaqtyq forýmy ótti.
Forýmǵa Qaraǵandy oblysy mektepteriniń qazaq tili men ádebieti pániniń muǵalimderi, JOO professor-oqytýshylary, mektepke deiingi uiymdar men bastaýysh synyp muǵalimderi, qosymsha bilim berý uiymdarynyń qazaq tili muǵalimderi, til oqytý ortalyqtarynyń oqytýshylary men ádiskerleri, til janashyrlary, qoǵam belsendileri men jýrnalister, blogerler, jalpy sany 500-ge jýyq adam qatysty.
Forýmdy Halyqaralyq «Qazaq tili» qoǵamy jáne QR Oqý-aǵartý ministrliginiń bastamasymen Qaraǵandy oblysynyń Tilderdi damytý jónindegi basqarmasy men oblystyq Bilim basqarmasy birlese uiymdastyrdy.
Halyqaralyq «Qazaq tili» qoǵamynyń negizgi jumys baǵyttarynyń biri – qazaq tili men ádebieti páni muǵalimderine ádistemelik qoldaý kórsetý. Osy maqsatta elimizdiń iri oblystary men qalalarynda qazaq tili men ádebieti páni muǵalimderiniń aimaqtyq forýmy uiymdastyrylady. Alǵashqy forým Qaraǵandy oblysy muǵalimderi men bilim salasy mamandary arasynda ótkizilip, muǵalimderdiń kásibi biliktiligin arttyrýǵa baǵyttalǵan ortaq alań – qaýymdastyq quryldy.
Halyqaralyq «Qazaq tili» qoǵamynyń prezidenti Raýan Kenjehanuly qazaq tiliniń qoldanys aiasyn keńeitý, mazmun qoryn kóbeitý, tildiń zamanaýi tartymdylyǵyn arttyrý baǵytyndaǵy is-sharalar men jobalardy tanystyrdy. Al Halyqaralyq «Qazaq tili» qoǵamynyń ǵylym jáne bilim jónindegi vitse-prezidenti Sherýbai Qurmanbaiuly óz baiandamasynda oqýlyq sapasy men muǵalimderdiń kásibi biliktiligin jetildirý taqyrybynda ózekti máselelerdi qozǵap, usynystaryn aitty. BMG UpSkill kompaniiasynyń direktory Ásel Muhametjanova bastaýysh synyp oqýshylarynyń oqý saýattylyǵyn arttyrý, Qaraǵandy oblysynyń Tilderdi oqytý ortalyǵynyń direktory Igenova Almagúl Aqmashqyzy til úiretýdegi tsifrlyq tehnologiialardyń múmkindikteri, «Til-Qazyna» ulttyq ǵylymi-praktikalyq ortalyǵy Ádisteme LAB basqarmasynyń basshysy Ysqaqova Jazira Maqsutqyzy qazaq tilin oqytýdaǵy IT-jobalar týraly aitty.
Jiynda qazaq tili men ádebieti páni muǵalimderiniń kásibi biliktiligin, oqytý ádistemesin jetildirý, muǵalimderdiń shyǵarmashylyq áleýetin damytý jáne pedagogikalyq sheberligin arttyrý, qazaqtildi oqýshylardyń oqý saýattylyǵy men akademiialyq jazý mádenietin damytý, qazaq tili men ádebieti pánin oqytýda tsifrlyq tehnologiialardy qoldaný máseleleri talqylandy.
Ár muǵalimge synypta qoldanylatyn ádistemeler men naqty quraldar usynyldy.
