Úkimet basshysy Asqar Mamin jumys saparymen Qaraǵandy oblysyna baryp qaitty. Jumys sapary barysynda Premer-ministr aýyl sharýashylyǵy ónimin ótkizýge arnalǵan «Soltústik-Ońtústik» baǵdaryn bailanystyratyn iri «Global City» kóterme-saýda ortalyǵynyń jumysymen tanysty, dep habarlaidy QazAqparat.
«Global City» kóterme-saýda ortalyǵy – azyq-túlikti saqtap, sortqa bólip, satýǵa arnalǵan iri hab jobasy. Ortalyqta ónimdi jappai jáne bólshektep satýǵa múmkindik bar. Deldalsyz aýyl sharýashylyǵy ónimderin ótkizý – Qaraǵandy naryǵynda ǵana emes, respýblikanyń ózge de aimaǵyndaǵy jemis-jidek pen kókónistiń baǵasyn tómendetýge jol ashady.
Ortalyqta iri kólemde saýda júrgizetinder úshin ártúrli temperatýralyq rejimi bar klimattyq qoima, qurǵaq qoima, ýaqytsha saqtaý qoimalary, temirjol tyǵyryqtary, krany bar konteinerlik aýmaqtar, kedendik resimdeý oryndary men tieý-túsirý tehnikalary qarastyrylǵan.
Shaǵyn saýda úshin keshen eki kross-dokty, al jappai satyp alýshylar úshin 164 tieý avtokóligin usynady. Bólshektik saýdaǵa arnalyp, munda aýmaǵy 42 myń sharshy metrlik kóterme-saýda ortalyǵy turǵyzylǵan. Onyń ishinde jeke turatyn 149 saýda pavilony men 2 myń sharshy metrlik arnaiy et pavilony bar.
Kompaniianyń kommertsiialyq departamentiniń direktory Nail Munasipov aityp ótkendei, keshendi turǵyzýdaǵy maqsat – kásipkerler men aýyl sharýashylyǵy taýaryn ónidirýshiler biznesin tabysty túrde júrgizý úshin jaily jaǵdai jasaý, saýda operatsiiasynan deldaldardy ysyrý, azamattardy daiyn ári jańa ónimdermen qamtamasyz etý bolyp otyr. Deldaldardyń jolyn kesý arqyly tutynýshyǵa jetetin túpki baǵa tómendeidi. Keshen aýmaǵy 60 ga aýmaqty alyp jatyr. Aldaǵy ýaqytta ony 100 ga-ǵa deiin keńeitý kózdelgen.
Halyqqa yńǵaily bolý úshin 2020 jyldyń sońynda kóterme-saýda ortalyǵynda avtostantsiia salynady.
Aita ketsek, kóterme-saýda ortalyǵyn turǵyzý jumysy «Biznestiń jol kartasy» jáne «Qarapaiym zattar ekonomikasy» memlekettik baǵdarlamalary aiasynda qoldaýǵa ie bolyp otyr.
