Kriminaldyq poltsiia qyzmetkerleri Qaraǵandy oblysynda 2007 jáne 2009 jyly týǵan aǵaly-qaryndasty balalardy azǵyndyq videoǵa túsirip, internetke taratqan 54 jastaǵy adamdy ustady, dep habarlaidy QazAqparat.
Ishki ister ministrliginiń baspasóz ókili Shuǵyla Turlybektiń aitýynsha, bul týraly vedomstvo ókilderine sheteldik áriptesteri habarlaǵan.
«Ishki ister ministrligi kriminaldyq politsiia departamentiniń qyzmetkerleri Qaraǵandy oblysynyń tártip saqshylarymen birge Qaraǵandy qalasynyń 54 jastaǵy turǵynyn ustady. Ol jas balalarǵa qatysty azǵyndyq áreketter jasap, videoǵa túsirip, internette taratqan. Ministrliktiń kiber-qylmyspen kúres ortalyǵynyń qyzmetkerleri sheteldik áriptesterinen TOR jabyq jelisine Qazaqstan aýmaǵynan belgisiz paidalanýshynyń jas balalardyń qatysýymen azǵyndyq kórinisteri bar beinejazbalardy taratatyny týraly aqparat aldy», - dedi ol onlain brifingide.
Ortalyqtyń jedel qyzmetkerleri sheteldik áriptesteriniń jón silteýi boiynsha beinejazbany egjei-tegjeili zerdelegen kórinedi.
«Onda belgisiz bireý balalarǵa azǵyndyq áreketter jasaidy. Ashyq derekkózderdi zertteý kezinde politsiia qyzmetkerleri beinejazbaǵa qatysqan balalarǵa uqsas balalardyń fotosýretterin tapty. Ótkizilgen jedel is-sharalardyń nátijesinde 2007 jáne 2009 jyly týǵan, kámeletke tolmaǵan aǵaly-qaryndasty balalar anyqtaldy. Olar byltyr analary qaitys bolǵannan keiin balalar úiiniń birinde tárbielenýde. Ákeleriniń qaida ekeni belgisiz. Ózderiniń aitýynsha, analarynyń kózi tirisinde tanys er adam kelip úi sharýasyna kómektesken. Analary úide bolmaǵan kezde ol balalarǵa azǵyndyq áreketter jasap, smartfonǵa túsirip otyrǵan. Bul birneshe ret qaitalanǵan. Biraq ol týraly anasy bilmegen», - deidi Shuǵyla Turlybek.
Onyń aitýynsha, ustalǵan kúdikti qaladaǵy kommýnaldyq kásiporyndardyń birinde jumys isteidi.
«Ol jaýap alý kezinde óz isi moiyndady. Tintý kezinde odan beinejazbalar saqtalǵan uialy telefon tárkilendi. 54 jastaǵy er adam qamaýǵa alynyp, ústinen qylmystyq is qozǵaldy», - dedi IIM baspasóz ókili.
