Qaraǵandy oblystyq sotynyń apelliatsiia alqasy kámeletke tolmaǵan qyz balany zorlaǵany úshin sottalǵan er adamnyń jazasyn ózgerissiz qaldyrdy. Ol óńirdegi kentterdiń birinde ózin imam retinde tanystyryp, birneshe ret 13 jasar jasóspirim qyzben qatynasqa túskeni úshin 20 jylǵa bas bostandyǵynan aiyrylǵan bolatyn, dep habarlaidy QazAqparat.
Esterińizge sala keteiik, aǵymdaǵy jyldyń qańtar aiynda politsiia Qaraǵandy oblysy kentteriniń birinde ózin imammyn dep tanystyrǵan er adamdy ustady.
Jalǵan imam jábirlenýshiniń ata-anasymen senimdi qarym-qatynasta bolyp, eresekterdiń joqtyǵyn paidalanyp, birneshe ret 13 jasar qyzdy zorlaǵan.
Saldarynan qyz bala júkti bolyp qalǵan .
Tergeý kezinde qaskúnemniń kinási dáleldenip, QR QK 120-baby 4-bóligi boiynsha 20 jylǵa bas bostandyǵynan aiyryldy.
Alaida sottalýshy qyz bala onymen óz erkimen bailanysqa túskenin aityp, apelliatsiialyq shaǵym jazǵan.
«Sottalǵannyń kinási sotta zerttelgen dáleldemelermen, onyń ishinde jábirlenýshiniń, onyń zańdy ókiliniń, kýálardyń aiǵaqtarymen, saraptama qorytyndylarymen jáne basqa is materialdarymen tolyq dáleldengen. Sottalǵanǵa negizgi jáne qosymsha jaza onyń jasaǵan is-áreketine bailanysty zańda kórsetilgen shekte, qylmystyń sipaty men qoǵamǵa qaýip dárejesi, jeke basy, jábirlenýshiniń pikiri eskerilip durys taǵaiyndalǵan. Taǵaiyndalǵan jazanyń mólsherin azaitýǵa, sottalǵannyń áreketterin qylmystyq zańnyń basqa babymen qaita saralaýǵa sot alqasy negiz anyqtamady. Úkim zańdy kúshine endi», - dep málimdedi Qaraǵandy oblystyq sotynyń baspasóz qyzmeti.
