Foto: QR EM
QR Energetika ministri Erlan Aqkenjanov Qaraǵandy oblysyna jumys sapary aiasynda óńirdiń negizgi energetikalyq nysandarynyń 2025–2026 jylǵy jylý berý maýsymyna daiyndyq barysyn tekserdi, dep habarlaidy Ult.kz.
Ministrdiń aitýynsha, Úkimettiń tapsyrmasymen qysqa daiyndyq kabinetterde esepter arqyly emes, tikelei nysandarǵa baryp, naqty daiyndyqty kózben kórý arqyly baqylanady.
Topar GRES-ine barǵanda ministr týrboagregatty aýystyrýdyń sońǵy kezeńimen tanysty. Jańa jabdyqty iske qosý aǵymdaǵy jyldyń tamyz aiyna josparlanǵan jáne ol óńirdegi jylý berý senimdiligin arttyrady. Sonymen qatar, stantsiiada jańa kúl-qoqys alańynyń qurylysy qarqyndy júrýde. Al Topar kentinde qyzmetkerlerge arnalǵan jańa turǵyn úiler salynady.
«Jyldar boiy sheshilmegen birqatar máseleler baryn bilemiz, biraq búgin naqty nátijelerdi kórý mańyzdy. Topar GRES-inde qýaty joǵary jańa týrbina iske qosylady. Qarmet JEO-2-de jetinshi qazandyqtyń iske qosý jumystary aiaqtalýda, al Shahtinsk JEO turaqty jumys istep tur. Bul — naqty tapsyrmalardyń oryndalýynyń kórinisi», — dedi Erlan Aqkenjanov.
Sapar barysynda qarjylandyrý máselesi de sóz boldy. Topar GRES-ine 2025–2026 jyldarǵa arnalǵan jóndeý jáne investitsiialyq baǵdarlamaǵa 34,6 mlrd teńge bólingen. Sonymen qatar, óńirdiń jylý júielerin jańartýǵa biyl 10 mlrd teńgeden astam qarajat qarastyrylǵan. Negizgi investitsiialyq jobalardyń biri — Jezqazǵan qalasynda 75 MVt qýatty bý-gaz qondyrǵynyń qurylysy, bul óńirdegi elektr qýaty tapshylyǵyn azaitýǵa múmkindik beredi.
Ministr kásiporyn qyzmetkerlerimen de tildesip, jumys barysyn baǵalady.
Energetika ministrligi elimizdiń energetikalyq nysandarynyń qysqa daiyndyq jumystaryn turaqty baqylaýda ustaidy. Barlyq jóndeý jumystary josparǵa sai júrgizilýde jáne Úkimettiń baqylaýynda.
