Qaraǵandy ákimdiginiń qyzmetkeri kópbalaly jáne turmysy tómen otbasylarǵa ataýly áleýmettik kómek kórsetýge arnalǵan qarjydan 1,6 million teńge jymqyrǵan, dep habarlaidy Sputnik Qazaqstan.
"25 shildede "Qaraǵandy qalasy jumyspen qamtý jáne áleýmettik baǵdarlamalar bólimi" MM áleýmettik tólemderdi taǵaiyndaý jónindegi sektorynyń bas mamany J. Smaǵulova 3 jylǵa bas bostandyǵynan aiyryldy. Ol óziniń qyzmettik babyn paidalana otyryp, ataýly áleýmettik kómek tóleýge ótinim bergen kezde basqa anketalyq derektiń ornyna óziniń jeke derektemelerin kórsetken jáne járdemaqyny alyp otyrǵan", - dedi Sybailas jemqorlyqqa qarsy is-qimyl agenttigi 1-shi departamentiniń aǵa tergeýshisi Daniiar Bigaidarov.
Smaǵulova barlyǵy 1,6 million teńge jymqyrǵan, bul qarajat áleýmettik jaǵynan osal 10 otbasyǵa AÁK retinde berilýi tiis bolǵan.
Úkim sottalýshynyń balasy 14 jasqa tolǵanǵa deiin 5 jylǵa keiinge shegerilgeni habarlandy.
Aita ketsek, osy jyldyń 1 sáýirinen bastap elimizde AÁK kórsetý mólsheri kúnkóris deńgeiiniń 50%-nen 70%-ne deiin kóterilip, 20 789 teńgeni qurady. Nátijesinde járdemaqy alýshylar sany 571,6 myń adamnan 830 myń adamǵa deiin ósti. Bul rette, eger AÁK-tiń ortasha mólsheri buryn otbasynyń árbir múshesine 4 834 teńgeni quraǵan bolsa, endi ár balaǵa 20 789 teńge tólenedi.
