kollaj: Tengrinews.kz
Qaraǵandy roýp-djampinginde qaza tapqan Evgeniia Leontevanyń ólimi týraly is boiynsha jaryssóz ótti, - dep habarlaidy Tengrinews.kz.
Fly Kazakhstan JShS-de beiresmi eńbek etken nusqaýshy roýp-djampingke qatysty qylmystyq is Qazybek bi aýdandyq sotynda qaralyp jatyr. Oǵan abaisyzda adamnyń ólimine ákep soqtyrǵan, tutynýshylardyń ómiri men densaýlyǵynyń qaýipsizdigi talaptaryna jaýap bermeitin jumystardy oryndaý nemese qyzmet kórsetý úshin aiyp taǵylady.
"Jaryssóz kezinde prokýror sottalýshyny 6 jylǵa bas bostandyǵynan aiyrýdy, eń tómengi qaýipsizdik qylmystyq-atqarý júiesi mekemesinde jazasyn óteýin surady", - dedi Qaraǵandy oblystyq soty ókilderi.
Sottalýshy kinásin moiyndamai otyr. Ol Fly Kazakhstan JShS-men resmi eńbek qatynastary bolmaǵanyn, qaza tapqan adamǵa "sekir" dep aitpaǵanyn málimdedi. Sondai-aq, ol osy qylmystyq is boiynsha kompaniia basshysy men tómende tejegish kabeldi bekitýi kerek bolǵan qyzmetkerdi jaýapqa tartý keregin aitty.
Aiyptalýshynyń sózderin onyń advokattary da qoldaidy. Jábirlenýshi tarap nusqaýshynyń kinási sotaldy tergeý barysynda dáleldengenine senimdi. Olar sottalýshyny qylmystyq jaýapkershilikke tartýdy talap etedi.
Eske salaiyq, 2021 jylǵy 10 qazanda Qaraǵandyda roýp-djampingte Shahtinsk qalasynyń 33 jastaǵy turǵyny Evgeniia Leonteva qaza tapqan bolatyn. Ol "Sozvezdie" qonaqúiiniń tóbesinen sekirip, aýyr jaraqat aldy. Ol shuǵyl túrde aýrýhanaǵa jatqyzyldy, bas súieginiń trepanatsiiasy júrgizildi, biraq dárigerler ony qutqara almady.
