Qaraǵandy oblysynda COVID-19 taralýymen kúres júrgizý jalǵasýda. Bul týraly Epidemiologiialyq jaǵdai týraly selektorlyq rejimde ótken apparattyq jinalysta málimdeldi.
30 naýryzdan bastap óńirdiń bes qalasynda jeke shekteý sharalary qarastyrylǵan karantin engizildi. Bul turǵyndarǵa ýaqytsha qatań shekteýlerdi saqtaýǵa týra keletinin bildiredi.
«Búgingi kúnnen bastap Qaraǵandy, Temirtaý, Abai, Saran jáne Shahtinsk qalalarynyń aýmaǵynda osy eldi mekender halqynyń ómiri men qyzmeti úshin erekshe jaǵdailar qarastyrylǵan karantin rejimi engiziledi. Iaǵni joǵaryda atalǵan qalalar biryńǵai karantindik aimaq bolyp tabylady. Bul qalalardyń turǵyndary kámeletke tolmaǵan balalardyń óz betinshe júrip-turýyna tyiym salý siiaqty shekteý sharalaryn saqtaýy qajet, 65 jastan asqan adamdarǵa dalaǵa shyqpaý, al jumys berýshilerge jumys kúnin 2 saǵatqa qysqartý usynylady», - dedi Qaraǵandy oblysynyń ákimi Jeńis Qasymbek.
Bul sharalardyń barlyǵy óńirde virýstyń taralýyna jol bermeý úshin qajet.
Búgingi kúni oblysta jeti adam koronavirýstyq infektsiiamen aýyrady. Dárigerler olardyń jaǵdaiyn qanaǵattanarlyq dep baǵalaidy.
Oblysta barlyǵy 592 adam táýlik boiy dárigerlerdiń baqylaýynda, taǵy 514 adam úilerinde oqshaýlanǵan.
Jaqyn arada oblysta 300 myń bailanyssyz termometr satyp alynady. «Kómek-2020» qoǵamdyq qorynyń qarajaty esebinen 20 myń respirator satyp alynady.
Jaqyn arada oblys emhanalarynda koronavirýsty anyqtaý úshin ekspress-testileý bastalady. Densaýlyq saqtaý basqarmasynyń basshysy Erjan Nurlybaevtyń aitýynsha, oblysqa 100 myń test kelip túsedi. Testileý qatań túrde klinikalyq belgiler bolǵan jaǵdaida tegin júrgiziledi, - dedi Erjan Nurlybaev.
Sondai-aq, óńirde aspaly búrikkishter satyp alyndy. Qazirgi tańda 56-y tústi, taǵy 170-i oblysymyzǵa Reseiden jetkiziledi.
Dárigerler úshin qorǵanysh kostiýmderin, maskalar men meditsinalyq qolǵaptardy jetkizý jalǵasýda.
Respýblikalyq biýdjetten koronavirýsqa qarsy kúreske qatysatyn meditsina qyzmetkerlerine syiaqy alýǵa qarajat bólindi. Qaraǵandy oblysynda 1677 dáriger men medbikeler jalaqy kóleminde syiaqy aldy. Tólemder jalǵasýda.
