Qaraǵandy oblysynda sý tasqynyna daiyndyq aiasynda sý ótkizý qubyrlaryn tazartý jáne qar shyǵarý jumystary jalǵasýda. Bul máseleler óńir ákimi Jeńis Qasymbektiń tóraǵalyǵymen ótken tótenshe jaǵdailar jónindegi óńirlik komissiianyń kezekti otyrysynda talqylandy, dep habarlaidy "Ult aqparat".
«Qazgidromettiń málimetinshe, oblys boiynsha jerdiń tońy 61-den 150 sm-ge deiin quraidy. Samarqan jáne Yntymaq sekildi iri sý qoimalarynan sanitarlyq sý aǵyzý júrgizilýde. Qazirgi ýaqytta óńirde 69 shaqyrym aryq pen 123 shaqyrym arna tazalandy. Sý tasqynyna daiyndyq kúndelikti baqylaýda», - dep málim etti TJD basshysy Murat Qatpanov.
Naýryz aiynyń basynda «Kóktem-2021» oqý-jattyǵýy ótti. Murat Katpanovtyń aitýynsha, bul joly barlyq kúsh-jiger tájiribelik sabaqtarǵa baǵyttalǵan. 6 myń metrge jýyq aryq, arnalar, 280 sý ótkizý qubyry tazartylyp, 27 myń tekshe metrden astam qar shyǵaryldy jáne 2 myń metr transheia tóseldi.
Vedomstvolyq mobildik toptar Qarqaraly, Buqar Jyraý aýdandary men Temirtaý qalasynyń aýyldaryn tekserdi. 11 eldi mekenniń basshylaryna sý tasqynyna daiyndyqtyń jetkiliksizdigi týraly eskertildi.
Jergilikti mańyzy bar 69 jol ýchaskesi erekshe baqylaýǵa alyndy. Materialdyq-tehnikalyq quraldar men inertti materialdar qoryna tekserý júrgizildi. Halyq úshin arnaiy usynystar ázirlendi.
15 naýryzdan bastap barlyq sý tasqynyna qarsy shtabtar táýlik boiy jumys isteitin bolady.
Oblystyń qalalary men aýdandarynyń basshylary TJD qyzmetkerlerimen birge asa qaýipti sý tasqyny ýchaskelerin aralaýdy jalǵastyrýda.
Oblys ákimi sý tasqyny kezeńine daiyndyq úshin árbir qyzmettiń jaýapkershiligin eske saldy.
«Negizgi mindet - azamattardyń qaýipsizdigin, sharýashylyq júrgizýshi sýbektilerdiń, tirshilikti qamtamasyz etý obektileriniń, kólik infraqurylymynyń aýmaqtaryn qorǵaýdy qamtamasyz etý bolyp tabylady. Sońǵy 3-4 jylda úlken jumys júrgizildi, biraq barlyq problemalar áli sheshilgen joq, sondyqtan daiyndyq erekshe bolýy tiis», - dep atap ótti Jeńis Qasymbek.
