Koronavirýs qarqyn alǵan kezde Qaraǵandy oblysyndaǵy aýyldardyń dári-dármeksiz qalǵany týraly másele áleýmettik jelilerde oqtyn-oqtyn kóterilgen bolatyn. Búgingi kúnde osy aitylǵan synnan qorytyndy shyǵarǵan oblys basshylyǵy jiberilgen kemshilikterdi joiumaqsatynda tyń da tiimdi jobalardy qolǵa aldy, – dep jazady Egemen.kz.
Mysaly, búgingi kúnde alystaǵy aýdan, shalǵaidaǵy aýyldarǵa qajetti dári-dármektiń mol partiiasy jyljymaly dárihanalardyń kómegimen jetkizile bastady. Ázirge bul igi is synama joba retinde oblystaǵy Aqtoǵai jáne Ulytaý aýdandaryn qamtyp otyr. Al oblystyq densaýlyq saqtaý basqarmasynyń basshysy Erjan Nurlybaevtyń aitýynsha, aldaǵy ýaqytta jyljymaly dárihanalar oblystyń basqa da aýdandary boiynsha dári-dármek jetkizýmen ainalysa bastaidy.
Joǵaryda atalǵan eki aýdan oblys ortalyǵynan shalǵaida ornalasqan. Olardaǵy aýyldar da aýdan ortalyǵynan jáne bir-birinen alys jerde jatyr. Eldi mekenderde dári-dármek satyp alatyn birde-bir kommertsiialyq dárihana bolmaǵandyqtan, turǵyndar qajetti preparattardy aýdandardaǵy ortalyq aýrýhanalardyń áleýmettik dárihanalarynan ǵana tabatyn.
Jyljymaly dárihanalar jobasyn júzege asyrýdyń tamasha sheshim bolǵanyn aita ketken lázim. Onda júrek-qan tamyry júiesi men gipertoniiasy bar patsientterge arnalǵan ómirlik mańyzy bar preparattar, BBQ men emdik shópterdi satyp alýǵa bolady. Sonymen qatar, aýyl turǵyndary qajetti dári-dármekke aldyn ala tapsyrys ta bere alady.
"Qazir bizde aýdandyq aýrýhanadan basqa statsionar, alty aýyldyq dárigerlik ambýlatoriia, bir feldsherlik-akýsherlik beket jáne aýyldarda 16 medpýnkt jumys isteidi. Bizdiń mobildi dárihana ambýlatoriialar men meditsinalyq pýnktter arqyly shalǵai eldi mekenderdi dári-dármekpen qamtamasyz etedi", – deidi Aqtoǵai aýdanynyń ortalyq aýrýhanasynyń direktory Sattar Ábdiǵulov.
Bul sharýany júzege asyrý úshin arnaiy qyzmetkerler aptasyna eki-úsh ret Qaraǵandyǵa baryp, farmatsevtikalyq kompaniialardan qajetti preparattardy kóterme baǵamen satyp alady eken. Dárihana áleýmettik bolǵandyqtan, barlyq dáriniń baǵasy kommertsiialyq ataýlarǵa qaraǵanda áldeqaida tómen. Eger jekemenshik dárihanalarda satý paiyzy shamamen 30%-ti qurasa, munda satyp alý baǵasyna tek 5% qana ústeme qosylatyn kórinedi.
Ótken aida qoimalarda bolmaǵandyqtan, keibir dári-dármek túrleriniń jetispeýshiligi baiqalǵany ras. Bul eń aldymen antibiotikterge, qabynýǵa, virýsqa qarsy jáne antikoagýlianttar siiaqty preparattarǵa qatysty boldy. Qazir qaiyrly is qaita jandanyp, aspirin, paratsetamol jáne olardyń balamalary, qan suiyltatyn preparattar, antibiotikter qaladan jetkizile bastapty.
Dál osyndai dóńgelekti dárihana Ulytaý aýdanynyń turǵyndaryn da dári-dármekpen qamtamasyz etip júr. Munda da meditsinalyq preparattardy tiegen kóliktiń aýyldarǵa barý kestesi aýdandyq gazetter men áleýmettik jelilerde jariialanyp turady.
