© Photo: Pixabay / Madeleine Lewander
Qarqaralyda aýyl ishine kirgen qasqyr úsh adamǵa shapty. Zardap shekkender aýrýhanaǵa júgingen, - dep habarlaidy Tengrinews.kz.
Qaraǵandy oblysy Densaýlyq saqtaý basqarmasynyń baspasóz qyzmeti Qarqaralyda meditsinalyq mekemege jyrtqysh tistep, ártúrli dárejede jaraqat alǵan úsh adam kelgenin rastady.
"Bir áieldi birneshe jerinen tistep alǵan, ekinshisiniń jaraqaty tereń. Úshinshisinde syzattar bar. Jaǵdailary birqalypty, olarǵa barlyq qajetti meditsinalyq kómek kórsetildi. Jaralary emdeldi, qutyrýǵa qarsy ekpe aldy jáne ambýlatorlyq emdelýge shyǵaryldy", - delingen basqarmanyń baspasóz qyzmeti habarlamasynda.
Al Qarqaraly aýdanynyń ákimdigi jaǵdai ákimniń jeke baqylaýynda ekenin habarlady. Aýdanda adamdarǵa shabýyl jasaýdyń jańa jaǵdailaryn boldyrmaý úshin politsiia qyzmetkerleri, veterinarlar jáne tótenshe jaǵdailar mamandary arasynan vedomstvoaralyq top qurylǵan.
"Vedomstvoaralyq top qasqyrdy izdestirip jatyr. Mektepter men basqa da oqý oryndarynyń janynan kúzet beketteri qoiyldy", - dedi aýdan ákimdigi baspasóz qyzmetiniń ókilderi.
Sondai-aq Qaraǵandy oblysy Politsiia departamentiniń baspasóz qyzmeti politsiia veterinariia organdarymen birlesip jyrtqysh janýardy joiý sharalaryn júrgizip jatqanyn atap ótti.
