Qaraǵandy oblysynda ótken táýlikte órtten úsh adam qaza tapty. Bul týraly QR Tótenshe jaǵdailar ministrliginiń resmi ókili Talǵat Ýáli málim etti, dep habarlaidy "Ult aqparat".
Atap aitqanda, 4 jeltoqsan kúni saǵat 12.28-de Abai qalasynda bes qabatty turǵyn úidiń tórtinshi qabatyndaǵy páterden órt shyqty. Úi zattary men aǵashtan jasalǵan tereze jaqtaýlary janǵan. Órttiń 5 sharshy metr aýmaqty sharpyǵan. Qutqarýshylar baspaldaq arqyly 2 adamdy evakýatsiialady. Jalyn saǵat 12.45-te tolyq sóndirilgen. Oqiǵa ornynda 58 jastaǵy páter iesiniń denesi tabyldy. 67 jastaǵy er adam kómirqyshqyl gazyna ýlanyp, aýrýhanaǵa jatqyzyldy.
«Sondai-aq, 5 jeltoqsanda saǵat 07.34-te Shahtinsk qalasynyń Shahan kentinde bes qabatty turǵyn úidiń besinshi qabatyndaǵy páterde órt shyqty. 40 sharshy metr aýmaq janǵan. Órt sóndirýshiler kireberisten baspaldaq arqyly 3 adamdy evakýatsiialady. Oqiǵa ornynda 1957 jyly týǵan er adam jáne 1962 jyly týǵan áiel qaza boldy. Qabyldanǵan sharalardyń arqasynda jalyn saǵat 08.45-te sóndirildi. TJD bólimshelerinen 16 adam men 3 tehnika jumyldyryldy. Aldyn ala boljam boiynsha, órttiń sebebi ashyq ot kózi (sirińke, temeki, sham jáne t.b.). QR TJM barsha azamattardan órt qaýipsizdigin qatań saqtaýǵa shaqyrady», - dedi T.Ýáli.
