Buqar Jyraý aýdanyndaǵy orman órti sóndirildi. Qarqaraly aýdanynda taǵy eki órt sóndirilip jatyr, - dep habarlaidy Tengrinews.kz.
Qaraǵandy oblysy TJD baspasóz qyzmetiniń málimetinshe, 21 maýsymda Buqar Jyraý aýdanynda Belaǵash ormandar men janýarlar dúniesin qorǵaý boiynsha orman sharýashylyǵy aýmaǵynan shyqqan tabiǵi órt 22 maýsymda saǵat 22:13-te joiyldy. Jalpy órt aýdany 101,5 gektar.
Qazirgi ýaqytta Qarqaraly aýdanynda tabiǵi órttiń eki oshaǵy sóndirilip jatyr.
Oblystyq TJD málimetinshe, órttiń alǵashqy oshaǵynyń aýdany shamamen 400 gektar (21 maýsymda Egindibulaq aýylynan soltústik-shyǵysqa qarai 10 shaqyrym jerde shyqqan), onda butalar men shópter byqsyp jatyr. Órtti TJD jáne orman sharýashylyǵy kúshteri sóndirip jatyr.
Órttiń ekinshi oshaǵynyń aýdany shamamen 500 gektar (22 maýsymda shyqqan).
"Órtti sóndirýge 182 adam, 30 dana tehnika jumyldyryldy. TJM tikushaqtarymen janyp jatqan ýchaskelerge sý jiberý jalǵasady. Barlyǵy 42 ret sý quiyldy", - dep habarlady baspasóz qyzmetindegiler.
Oqiǵa orny taýly, jartasty jer bolǵan soń órtti sóndirý qiynǵa soǵyp jatyr. Oǵan qosa jaqyn jerde sý qoimasy joq, jeldiń baǵyty sát saiyn ózgeretini habarlandy.
