Qaraǵandy oblysynyń Nura aýdanynda brakonerler 72 kiikti óltirip, múiizin kesip alyp ketken, dep habarlaidy QazAqparat.
Bul týraly QR Ekologiia, geologiia jáne tabiǵi resýrstar ministrligi Orman sharýashylyǵy jáne janýarlar álemi komitetiniń tóraǵasy Ashat Qainarbekov málim etti.
«2019 jyldyń 26 qazanynda «Ohotzooprom» ÓB RMQK Ortalyq óńirlik filialynyń jedel toby Nura aýdanynda múiizi kesilgen 30 óli kiik tabyldy. Atalǵan fakt Nura aýdanynyń politsiia bóliminde sotqa deiingi tergeýdiń biryńǵai tizimine tirkelip, Qylmystyq kodekstiń 337-baby 4-tarmaǵy boiynsha is qozǵaldy», - dedi spiker elordada ótken brakonerlikpen kúres týraly brifingte.
Al 27 qazan kúni taǵy 42 óli kiik tabyldy. 72 kiiktiń 67-si úlken, 5-ýi - jas tól bolǵan.
«Oqiǵa ornynan «Fetter» markaly 12 kalibrli 5 gilza tabyldy. Sol kúni «Ohotzooprom» ÓB RMQK jáne Nura aýdanynyń politsiiasy júrgizgen jedel-izdestirý sharasynda Qonaqai kóliniń mańynan kiik atqan Toiota markaly eki avtokólik tabyldy. Kólik ieleri Aqmola men Qostanai oblystarynyń arasyndaǵy Mailykólge qarai qashqan. Tártip buzýshylar izdestirilip jatyr. Bul jaǵdai boiynsha, Nura aýdany IIB barlyq jeke quramy men Qaraǵandy oblysy boiynsha habar jiberildi», - dep túsindirdi ministrliktiń baspasóz qyzmeti.
Eske sala ketsek, QR Ulttyq qaýipsizdik komiteti Qytaiǵa kiik múiizin kontrabandalyq jolmen tasymaldaǵan qylmystyq topty ustaǵan edi. Málimetke sai, olar 1 tonna 118 kg (3 myńnan astam janýar) kiik múiizin shekara asyrmaqshy bolǵan.
Osyǵan bailanysty, Memleket basshysy Qasym-Jomart Toqaev Twitter-degi paraqshasynda quqyq qorǵaý organdaryn kiikti zańsyz qyrǵan qaskóilerdiń áreketine toqtaý salýǵa shaqyrdy.
