Foto: Tótenshe jaǵdailar ministrliginiń baspasóz qyzmeti
Qaraǵandy oblysynda kópqabatty úiden órt shyǵyp, 6 adam qaza tapty, - dep habarlaidy "Ult aqparat" Tótenshe jaǵdailar ministrliginiń baspasóz qyzmetine silteme jasap.
Órttiń shyǵýyna sebep bolǵan jaǵdailardy zertteý úshin oqiǵa ornyna QR Tótenshe jaǵdailar ministrligi Órtke qarsy qyzmet komitetiniń tóraǵasy Nurbolat Derbisov barǵan.
"16 jeltoqsan saǵat 01:51-de Temirtaý qalasynyń Aqtaý kentindegi (jaqyn jerdegi órt sóndirý bóliminen 27 shaqyrym jerde) 5 qabatty turǵyn úide órt shyqqany týraly habar tústi. Alǵashqy órt sóndirý bólimi oqiǵa ornyna 02:25-te jetti. 1-qabattaǵy 3 bólmeli páterde 40 sharshy metr aýmaqta órt shyqqan. Tótenshe jaǵdailar departamentiniń bólimsheleri kelgenge deiin turǵyndar 5 adamnyń máiitin (2007, 2010 j.t. uldar, 1983, 1991 j.t. áielder, 1991 j.t. er adam) kireberisten kóshege alyp shyqty: zardap shekken adamdar joǵarǵy qabattardaǵy páterlerden tútin basqan kireberis arqyly óz betimen evakýatsiialanbaq bolǵan. Baspaldaq alańynda órt bolǵan joq, alaida tútin saldarynan turǵyndar dalaǵa shyǵyp úlgermegen.
Órt sóndirý bólimsheleri barlaý jáne janyp jatqan páterdegi órtti sóndirý barysynda altynshy marqumnyń (1977 jyly týǵan er adam) denesi tabyldy. Úsh adam ártúrli dene jaraqatyn alǵan (aýyrlyǵy ortasha)", - delingen habarlamada.
Sondai-aq órt sóndirýshiler baspaldaq pen tynys alý apparatynyń kómegimen tútin basqan páterdiń kireberisinen 10 adamdy, onyń ishinde 4 balany qutqarǵan. Qabyldanǵan sharalar nátijesinde órt 03:10-da oqshaýlanyp, 04:00-de sóndirilgen.
Órtti joiýǵa Qaraǵandy oblysy Tótenshe jaǵdailar departamentiniń 16 qyzmetkeri men 4 birlik tehnikasy jumyldyrylǵan.
Órttiń shyǵý sebebi anyqtalyp jatyr. Oqiǵa ornynda synaq órt zerthanasynyń mamandary men tergeýshiler jumys isteýde.
Órt faktisi boiynsha politsiia qyzmetkerleri QR Qylmystyq kodeksiniń 292-baby boiynsha qylmystyq is qozǵady.
"Órt kezinde tútin basqan dálizder nemese baspaldaqtar arqyly evakýatsiialaýǵa áreket jasaý qaýipti ekenin eske salamyz. Tótenshe jaǵdaida tútin basqan bólmelerden ótý kezinde tynys alý joldaryn dymqyl shúberekpen jabý kerek.
Eger órt páterden tys jerde bolsa, eń senimdi nusqa - órt sóndirýshiler kelgenge deiin ony tastamai ustaý. Muny isteý úshin aldyńǵy esiktegi jaryqshaqtardy dymqyl shúberekpen jabyńyz nemese esikke dymqyl kórpeni ilip qoiyńyz. Bul sharalar tútinnen aýlaq bolýǵa kómektesedi. Baspaldaqta ashyq janý bolmasa da, tútinniń kontsentratsiiasy saldarynan dalaǵa shyǵýǵa múmkindik bolmai qalady" - delingen TJM habarlamasynda.
