Qaraǵandyda kópqabatty úilerdiń birinde gaz ballony jaryldy. Oqiǵa saldarynan aýrýhanaǵa óte aýyr halde er adam jetkizildi, dep habarlaidy "Ult aqparat".
Qaiǵyly oqiǵa Qaraǵandynyń 21-inshi shaǵynaýdanynda, besinshi qabattaǵy bir bólmeli páterde boldy. Syiymdylyǵy 27 litr bolatyn gaz ballony jarylǵan.
«16 naýryzda saǵat 00.45-te Qaraǵandynyń 21-shaǵynaýdanynda 5-qabattaǵy bir bólmeli páterde gaz-aýa qospasynyń jarylysy bolyp, 5 sharshy metr aýmaqta úi zattary men jihazdary janyp ketti. Órt ornynan 1994 jyly týǵan er adam aýrýhanaǵa jetkizildi. Órt 1 saǵat 19 minýtta sóndirildi. TJD kúshimen baspaldaq marshy boiynsha bir adam qutqarylyp, 25 adam (onyń ishinde alty bala) evakýatsiialandy. Oqiǵa ornyna TJD-niń 40 qyzmetkeri men 11 tehnikasy jumyldyryldy. Aldyn ala boljam boiynsha, ottyń shyǵý sebebi – 27 litrlik gaz ballonynyń redýktorynan gaz-aýa qospasynyń aǵyp ketýi. Qaraǵandy oblysynyń TJD eske salady: 2 qabattan artyq qabatty kóppáterli úilerde gaz ballondaryn paidalanýǵa tyiym salynady. Tek jaramdy gaz jabdyqtaryn paidalaný qajet», - dep habarlady Qaraǵandy oblystyq TJD-dan.
Qaraǵandy oblysynyń Densaýlyq saqtaý basqarmasy er adamnyń jaǵdaiy týraly habarlady.
«16 naýryzda 1994 jyly týǵan naýqas Prishahtinskiden jedel járdem brigadasymen Maqajanov klinikasynyń qabyldaý bólmesine shamamen 1 saǵat 30 minýtta jetkizildi. Naýqas óte aýyr jaǵdaida, aiaq-qol, bet, moiyn, arqanyń 45% III B dárejeli kúiik jaraqatymen, kúiik shogy kúiinde jetkizildi. Qazirgi ýaqytta naýqas jansaqtaý bóliminde jatyr, jaǵdaiy turaqty aýyr dep baǵalanýda», - dep naqtylady vedomstvodan.
Jarylys saldarynan turǵyn úide elektr energiiasy aqaýlary paida boldy. Alaida, «Qaraǵandy Jaryq» JShS baspasóz qyzmetiniń habarlaýynsha, qazir elektr qýaty tek jarylys bolǵan kireberiste ǵana joq. Oktiabr aýdanynyń ákimdigi páter men kireberisti tazalaý jumystaryn uiymdastyrdy.
«Turǵyndar arasynda basqa zardap shekkender joq jáne olardyń barlyǵy óz páterlerinde. Úide jylytý jáne sý berý qalypqa keltirildi. Elektr energiiasyna keletin bolsaq, ol tek órt bolǵan kireberiste ǵana joq, jaqyn arada «Qaraǵandy Jaryq« JShS mamandary máseleni sheshetin bolady. Jergilikti ákimdiktiń kúshimen páterdi bolǵan jaǵdaidan tazartý jumystary uiymdastyryldy», - dep túsindirdi vedomstvoda.
