Qaraǵandy oblysynyń eldi mekenderinen 1.5 mln tekshe metr qar shyǵaryldy. Bul qardyń kóp bóligi oblys ortalyǵyna tiesili. Osy jáne basqa da is-sharalar týraly Tótenshe jaǵdailar departamentiniń basshysy Ibragim Kúlshimbaev apparattyq keńeste málim etti, dep habarlaidy "Ult aqparat".
Qaraǵandy oblysynda sý tasqynyna daiyndyq biylǵy jyldyń qańtar aiynyń birinshi aptasynda bastaldy. Jaǵdaidy qardyń erekshe qalyń túsýi qiyndatyp otyr. Osy jyly aq ulpa normadan tórt ese artyq jaýǵan.
«Sý tasqynynyń qalypty ótýi kóp jaǵdaida infraqurylym men sý obektileriniń daiyndyǵyna bailanysty bolady. Oblys ákimdiginde aýdandardaǵy bólimshelermen jumys toby quryldy. Ol kún saiyn eldi mekenderdegi gidroqurylystar men ahýaldyń jaǵdaiyna monitoring júrgizedi. Sý qoimalarynan sý aǵyzý rejimin jáne toltyrý normalaryn saqtaýdy uiymdastyrý qajet. Sý ótkizý qurylystarynyń jai-kúiine erekshe nazar aýdarý kerek. Sondai-aq qaýip tóngen jaǵdaida aimaqtaǵy adamdardy qulaqtandyrý kerek», - dedi Qaraǵandy oblysynyń ákimi Jeńis Qasymbek.
Tótenshe jaǵdailar departamentinde sý tasqyny kezeńinde qajet bolýy múmkin tehnika sany naqtylandy. Olardyń ieliginde ótimdiligi joǵary vahta avtobýsy, batpaqta júre alatyn kólik, qaiyq, motopompa jáne gidrokostiým bar.
Ibragim Kúlshimbaevtyń aitýynsha 25 aqpannan bastap oblysta sý ótkizý qubyrlary tazartylady. 1 naýryzdan bastap oblystyń iri ózenderinde muz jarý jumystary júrgiziledi. Jarylys jumystary 20 ýchaskede ótkizilýi tiis.
Qaýipti aimaqtarda ornalasqan aýyldardyń mańynda jer sý bógeitin úiindi turǵyzylyp, gabiondardy nyǵaitý jumystary bastaldy.
«Kazgidromet» boljamy boiynsha sý tasqyny naýryzdyń úshinshi onkúndiginde bastalady dep kútilýde. Osy ýaqytta oblystyń barlyq aýmaǵynda aýa temperatýrasy nólden joǵary bolady. Sinoptikterdiń aitýynsha, naýryz aiynda aýa raiy jyly jáne jaýyn-shashynsyz bolady.
