Qaraǵanda oblysynda Covid indetiniń órshýine bailanysty 12 sáýirden jańa shekteýler engiziledi. Bul jóninde búgin ótken brifingte oblystyń bas sanitar dárigeri Iýrii Zalygin habarlady.
Bilik ókilderiniń aitýynsha, halyq karantin erejelerine baǵynbaǵandyqtan, koronavirýs juqtyrǵandar kóbeie túsken. Oblys boiynsha ásirese Qaraǵandy, Temirtaý, Priozersk qalalarynda jáne Abai, Buqar jyraý, Ulytaý aýdandarynda indet órshigen. Qazir oblysta Covid diagnozy zerthanada dáleldengen 18 715 naýqas tirkelgen.
12 sáýirden oblys aimaǵynda kóp mekemeniń jumysy toqtaidy. Olardyń arasynda oiyn-saýyq mekemesi (tek Qaraǵandy qalasyndaǵy kei nysandarda Ashyq jobasy aiasynda kelýshilerdi birneshe kategoriiaǵa bólip qabyldaýǵa ruqsat bar), balalardyń oiyn ortalyǵy, mekteptegi sektsiia, krýjoktar, teatr men kinoteatr, kotsert zaly, tsirk, býkmekerlik keńse, banket zaly, mádeniet nysany (tek kitaphana men mýzei 30 adamǵa deiin qabyldai alady) siiaqty oryndar bar. Oqýshylardy jeke-dara oqytýǵa da ruqsat etilmeidi. Ekskýrsiia, kóńil kóteretin, buqaralyq shara, forým, konferentsiia, kórme men jármeńkege de tyiym salyndy.
Jattyǵý zaly, sán salony, fitnes ortalyǵy jáne basseinder aldyn ala jazylý tártibimen jumys isteidi. Senbi-jeksenbide búkil el aýmaǵyndaǵy saýda-saýyq ortalyqtary, azyq-túlikten ózge taýar satatyn úlken dúkender, sporttyq-emdeý ortalyqtary, jabyq bazarlar jabyq bolady. Tóbesi ashyq bazarlar tek jeksenbi kúnderi jabylady. Senbi, jeksenbide qalaaralyq jolaýshy tasymalyna da tyiym salynady.
Bilik ókilderi jekemenshik jáne memlekettik mekeme qyzmetkerleriniń 80 paiyzyn qashyqtan jumys istetýge shaqyrdy. Mektepter áli aralas formada oqytyp jatyr, degenmen 6, 7, 8 jáne 10-synyp oqýshylary qashyqtan oqý júiesine kóshken. Mektepke deiingi jáne bastaýysh mektep oqýshylary ǵana dástúrli formada bilim alyp jatyr. Balabaqshalarda tek kezekshi toptar ǵana qalǵan.
Jergilikti biliktiń habarlaýynsha, 10 sáýirden bastap Qaraǵandy oblysynda jurtqa koronavirýs infetsiiasyna qarsy ekpe salý naýqany bastalmaq. Resei shikizaty negizinde Qaraǵandy farmatsevtika kesheninde ázirlenetin reseilik "Spýtnik V" vaktsinasynyń ondaǵan myń dozasy aýdandardaǵy aýrýhanalarǵa taratylyp jatyr. Bilik ókilderiniń málimdeýinshe, jaqyn kúnderi aimaqqa taǵy 55 myń doza vaktsina keledi. Buǵan deiin meditsina qyzmetkerlerine, muǵalimderge jáne kúsh qurylymdarynyń ókilderine vaktsina salynyp kelse, endi erik bildirgenderdiń bári ekpe almaq. Tek ol úshin tirkelgen emhana ne eGov mobile qosymshasy arqyly ýaqytyn aldyn ala belgilegen jón.
