Qaraǵandy oblysynyń prokýratýrasy jalpy somasy 27,3 mlrd teńgeni quraityn 54 memlekettik satyp alýdyń kúshin joiǵan.
Prokýratýra aqparatyna súiensek, Balqash qalasynyń turǵyn úi-kommýnaldyq sharýashylyǵy, jolaýshylar kóligi jáne avtomobil joldary bóliminiń jaýapty qyzmetkerleri zań talaptaryna qaishy sý qubyryn kúrdeli jóndeý boiynsha 625 mln teńgege memlekettik satyp alýdy jobalyq-smetalyq qujattamasyz jáne saraptamalyq qorytyndysyz ótkizgen.
Al Qaraǵandy oblysynyń Tabiǵi resýrstar jáne tabiǵat paidalanýdy retteý basqarmasy 75,2 mln teńge somasyna lastaýshy zattardy shyǵarýdyń mólsherin ólsheýge arnalǵan jabdyqtar men aspaptardy satyp alýdy negizsiz josparlaǵan. Alaida bul jumys atalǵan memlekettik mekemeniń quzyretine jatpaidy.
Prokýratýra, budan bólek, taǵy 52 tapsyrystyń kúshi joiylǵanyn aittady. Keri qaitarylǵan biýdjet qarajaty oblystyq biýdjetke kelip, qaita bólýge jiberilgen.
29 qańtarda Qaraǵandy oblysynyń Aqtoǵai aýdanynda is júzinde joq joldy jóndeýge konkýrs jariialanyp, 328 mln teńge bólgen. Oblystyq prokýratýra máseleni zerttep, konkýrsty ótkizbei tastaǵan.
«Aqtoǵai aýdany prokýratýrasynyń narazylyǵy boiynsha aýdannyń Ekonomika jáne qarjy bóliminiń jalpy somasy 328 million teńgeden asatyn is júzinde joq «Aqjaryq-Appaz» tas jolyn aǵymdaǵy jóndeýge ashyq konkýrs ótpei qaldy. Joldyń bul ýchaskesinde jergilikti jáne oblystyq deńgeidegi ýákiletti organdardyń balansynda eshqandai jol joq ekeni anyqtaldy», – delingen oblystyq prokýratýra habarlamasynda.
Óńirlik ekonomika bólimi «Avtomobil joldary týraly» zańdy buzǵan, iaǵni qoldanystaǵy emes, salynbaǵan joldy jóndeýge tyrysqan. Ekinshiden, «Qazaqstan Respýblikasyndaǵy sáýlet, qala qurylysy jáne qurylys qyzmeti týraly» zańdy buzyp, qurylys jobalyq qujattama joq jańa jol salýǵa tyrysqan.
Al 2023 jyldyń 23 jeltoqsanynda Qaraǵandy qalasynyń Qazybek bi atyndaǵy aýdandyq prokýratýrasy jergilikti atqarýshy organdar kommertsiialyq maqsatqa jer bergende buzýshylyqtarǵa jol bergenin anyqtaǵan.
«Qaraǵandy qalasynyń ákimdigi baǵalaý rásimin júrgizbesten, buryn alynǵan jer ýchaskeleriniń ornyna turǵyn emes úi-jailary bar kóppáterli turǵyn úi salý jáne ony odan ári paidalanýǵa berý úshin kommertsiialyq maqsatqa 14 jer ýchaskesin bergen. Osy oraida jergilikti atqarýshy organ «Memlekettik múlik týraly» Zańnyń 62-1-babyn buzylýyna jol bergen», – dep jazylǵan taratylǵan habarlamada.
Prokýratýranyń aralasýymen qala ákimdigi joǵaryda atalǵan qaýlynyń kúshin joiý týraly talaptardy tolyq kólemde qanaǵattandyrdy. Osylaisha, quny 158 mln teńge bolatyn 4 ga kommertsiialyq maqsattaǵy 14 jer ýchaskesi memleket menshigine qaitaryldy.
