19 aqpanǵa qaraǵan túni Qaraǵandy oblysynyń Osakarov aýdanyna qarasty joldarda qutqarý jumystary júrgizildi. TJD qyzmetkerleriniń kómegimen 40 adam qutqaryldy, onyń ishinde 29 adam jylytý pýnktine ornalastyryldy, dep habarlaidy "Ult aqparat".
Osakarov aýdanynda apattyq-qutqarý jumystary «Almaty-Ekaterinbýrg», «Osakarovka-Molodejnyi» jáne «Osakarovka-Nura» avtojoldarynda júrgizildi.
«Almaty-Ekaterinbýrg» avtojolynan Osakarovka kentindegi jylytý pýnktine deiin jolaýshylar avtobýsyn alyp júrý uiymdastyryldy. Halyqaralyq baǵyttaǵy avtobýsta bolǵan 29 adam jergilikti mádeniet úiinde ornalastyryldy. Olardyń barlyǵy - Mońǵoliia azamattary. Jolaýshylardyń eshqaisysyna meditsinalyq kómek qajet bolmady. Sonymen qatar qar qursaýynan 4 jeńil avtokólik shyǵyp, 11 adam qutqaryldy.
Qutqarý jumystary Qaraǵandy oblysynyń TJD bólimsheleri men jergilikti atqarýshy organdardyń kúshimen júrgizildi.
Sondai-aq, Osakarov aýdanynyń Senokosnoe aýylynda qarda júretin kólikpen mal izdeýge shyǵyp, úiine oralmaǵan eki adam izdestirilýde. Izdestirý-qutqarý jumystary TJD basshylyǵynyń baqylaýynda.
«Qazaqavtojol» JShS málimetteri boiynsha aýa raiynyń nasharlaýyna bailanysty (boran, joldyń nashar kórinýi) respýblikalyq mańyzy bar avtojoldardyń 8 ýchaskesinde avtokóliktiń barlyq túrleri úshin qozǵalys jabyldy.
«Ótkizý pýnktterinde 261 tehnika (69-júk, 175-jeńil, 17-avtobýs) bar. Joldardy tazalaý úshin barlyǵy 184 tehnika men 251 adam jumyldyryldy», - dep habarlady Qaraǵandy oblysy TJD baspasóz qyzmeti.
Aýa raiynyń nasharlaýy jáne avtojoldardyń jabyq bolýy týraly aqparat barlyq BAQ-ta, áleýmettik jelilerde, TJD vedomstvolyq internet-resýrsynda jáne «Darmen» mobildik qosymshasynda jedel túrde ornalastyrylady.
