Qaraǵandy oblysy ákiminiń jańa orynbasary taǵaiyndaldy. Bul týraly "Ult aqparat" ákimdiktiń baspasóz qyzmetine silteme jasap habarlaidy.
Bul mindetti Álisher Ábdiqadyrov atqaratyn bolady. Ol ónerkásip, ShOB damytý, indýstriialandyrý jáne investitsiialar máseleleri boiynsha óńirde jetekshilik etetin bolady.
Álisher Ábdiqadyrov Lomonosov atyndaǵy MMÝ-de bakalavriatty támámdady. Ekonomika magistri.
Eńbek jolyn 2009 jyly indýstriia jáne jańa tehnologiialar ministrligi Investitsiia komitetiniń sarapshysy qyzmetinen bastaǵan. 2013 jyly ol osy ministrliktiń strategiialyq josparlaý departamenti direktorynyń orynbasary qyzmetin atqardy. 2014 jylǵy aqpannan bastap 2015 jylǵy shildege deiin Qazaqstan Respýblikasy Investitsiialar jáne damý ministrliginiń Investitsiia komiteti tóraǵasynyń orynbasary boldy.
Keiin, 2016 jyldyń shildesine deiin Pavlodar oblysynyń indýstriialyq-innovatsiialyq damý basqarmasynyń basshysy qyzmetin atqardy.
2016 jyldan 2019 jylǵa deiin Nur-Sultan qalasynyń Investitsiia jáne kásipkerlikti damytý basqarmasynyń basshysy boldy. Osy taǵaiyndalǵanǵa deiin «QazIndustry Qazaqstandyq indýstriia jáne eksport ortalyǵy» AQ Basqarma tóraǵasy qyzmetin atqardy.
