Qaraǵandy oblysy ákiminiń burynǵy orynbasary Jandos Ábishev jáne onyń aǵasy Eldar Ábishevke qatysty qozǵalǵan qylmystyq istiń aldyn ala tyńdaýy 9 tamyzǵa taǵaiyndaldy, dep habarlaidy QazAqparat.
Qaraǵandy qalasynyń Qazybek bi aýdandyq sotynyń óndirisine oblys ákiminiń burynǵy orynbasary Jandos Ábishev pen onyń aǵasyna qatysty qylmystyq is kelip tústi. Aiyptalýshylar kinásin moiyndaý týraly is júrgizý kelisimin jasaǵan.
Sot materialdaryna sáikes, Qaraǵandy oblysy ákiminiń áleýmettik máseleler jónindegi burynǵy orynbasary Jandos Ábishevke QR QK-niń 364-babynyń 3-bóligi boiynsha «Jaýapty memlekettik laýazymdy atqaratyn tulǵanyń kásipkerlik qyzmetke zańsyz qatysýy» degen aiyp taǵyldy. Burynǵy sheneýnik qazirgi tańda qamaýda.
«Protsessýaldyq kelisimmen kináni moiyndaý týraly mámile túrinde kelip túsken qylmystyq is óndiriske qabyldandy. Aldyn ala tyńdaý 9 tamyzǵa belgilendi», - dep habarlady Qazybek bi aýdandyq sotynda.
Eske sala keteiik, biyl aqpan aiynda Sybailas jemqorlyqqa qarsy is-qimyl jónindegi ulttyq biýro Qaraǵandy oblysy ákiminiń burynǵy orynbasaryna qatysty sotqa deiingi tergeýdi bastady.
«Sybailas jemqorlyqqa qarsy kúres Ulttyq biýrosy Qaraǵandy oblysy ákiminiń burynǵy orynbasaryna qatysty sotqa deiingi tergeý amaldaryn júrgizýde. Ol oblystyń jumyspen qamtý jáne áleýmettik baǵdarlamalardy úilestirý basqarmasynyń laýazymdy tulǵalarymen aldyn ala sóz bailasý arqyly adamdar tobynda oblystyń múmkindigi shekteýli adamdaryn arnaiy qatynas kólikterimen qamtamasyz etýge bólingen 36 mln teńgeden astam somadaǵy biýdjet qarajatyn jymqyrdy degen kúdikke ilinip otyr», - dedi agenttikte ótken baspasóz máslihatynda Arman Berdalin.
Onyń aitýynsha, atap aitqanda, tehnikalyq sipattamaǵa sáikes kelmeitin jáne kóterińki baǵada múmkindigi shekteýli adamdarǵa arnalǵan kreslo-arbalaryn jetkizý boiynsha qylmystyq is qozǵalǵan.
Eske sala ketsek, Jandos Ábishev 2014 jyldyń qyrkúieginen 2019 jyldyń 16 qańtaryna deiin Qaraǵandy oblysy ákiminiń orynbasary qyzmetin atqardy. Ol óńirdiń áleýmettik salasy máselelerine jetekshilik etti.
