Qaraǵandy oblysynyń turǵyndary Tuńǵysh Prezident kúni men Táýelsizdiktiń 30 jyldyǵy qarsańynda «Saryarqa» magistraldyq gaz qubyry arqyly kópten kútken kógildir otynǵa qol jetkizdi. Ortalyqtandyrylǵan gazǵa alǵashqy bolyp Qaraǵandy men Temirtaý qalalary qosyldy, dep habarlaidy "Ult aqparat".
– Búgingi meniń qýanyshymdy sózben jetkizý múmkin emes. Kómir tasý, kúl shyǵarýdyń azaby qandai ekenin kóp adam bile bermeidi. Qazir aýyr jumysqa shamam da kelmeidi. Endi kómir tasyp, azaptanýdyń qajeti joq. Qosyp qoiyp, arasynda baqylap turamyn. "QazTransGaz" qyzmetkerlerine alǵysym sheksiz, - deidi Viacheslav Brajnikov.
Viacheslav Brajnikovtyń úiine gaz arqyly jylytýǵa qajetti barlyq tehnika ornatylǵan. Tipti iis tiýdiń aldyn alatyn qaýipsizdik qurylǵysy da bar.
Qazirgi tańda Temirtaý qalasy boiynsha 500-ge jýyq úi gazǵa qosylýǵa daiyn. 2025 jylǵa qarai qaladaǵy 5 myńǵa tarta turǵyn úige ortalyqtandyrylǵan gaz tartylady.Sondai-aq aldaǵy tańda óńirdegi iri kásiporyndardy da birtindep gazǵa qosý jumystary júrgizilmek. Bul aýaǵa jiberiletin ziiandy qaldyqtardyń kólemin azaityp, ekologiialyq máselelerdi ońtaily sheshýge múmkindik beredi.
Jalpy Qaraǵandy qalasynda eki qosý kesheni iske qosylyp, 64 shaqyrymnan astam gaz qubyry salyndy. Jobanyń birinshi kezeńinde 3 myńǵa jýyq úidi gazdandyrýǵa múmkindik berse, aldaǵy ýaqytta taǵy 13 myńǵa jýyq tutynýshy kógildir otynǵa qol jetkizedi.
– Úsh jyl buryn «Saryarqa» gaz qubyryn salý jobasy bastalǵan bolatyn. Magistraldyq jelilerdi tartý ótken jyly aiaqtaldy. Biyl úilerge taratý jelileri júrgizilip, jumystar sátti aiaqtaldy. Bul halyqtyń turmys jaǵdaiyn jaqsartýǵa jáne kóptegen ekologiialyq máselelerdi ońtaily sheshýge múmkindik beredi. Elimizdiń 30 jyldyǵy men Tuńǵysh Prezident kúni qarsańynda ótken búgingi sharany úlken jetistik dep sanaimyn,– dedi Qaraǵandy oblysynyń ákimi Jeńis Qasymbek.
Qaraǵandydaǵy gazdyń kelýin qala turǵyndary zor qýanyshpen qarsy aldy. Ásirese, Mihailov shaǵyn aýdanynda turatyn Jeńisbek esimdi qarttyń qýanyshy erekshe.
– Biz úshin búgin armandardyń oryndalǵan kúni. Ózim jer úide turǵandyqtan ot jaǵýdyń qiyndyǵyn bir kisidei bilemin. Gaz ben kómir arasyndaǵy aiyrmashylyqty da bilesizder. Kómirdiń shańymen únemi dem alý aǵzaǵa ziiandy. Barlyq qala turǵyndaryn búgingi qýanyshtarymen quttyqtaimyn. Osy iske bastamashyl bolǵan adamdarǵa alǵysym sheksiz, – deidi qala turǵyny Jeńisbek Súiindikuly.
Qaraǵandy oblysynyń iri úsh qalasynda gaz qubyrlaryn tartý jobasynyń birinshi kezeńi aiaqtaldy. Nysandar «QazTransGaz Aimaq» AQ basqarýyna berildi. Onyń mindetterine gazdy taratý ,tasymaldaý kiredi. Aldaǵy kúnderi Jezqazǵan qalasyndaǵy úiler gazǵa qosylady dep josparlanýda.
Mereke qarsańynda Elbasynyń eńbek joly bastalǵan – Temirtaý qalasynda Tuńǵysh Prezident kúnin erekshe atap ótildi. Osyǵan orai metallýrgter qalasynda kóptegen ult pen ulystyń basyn biriktiretin Dostyq úii ashyldy.
Jańa áleýmettik nysandy Qaraǵandy oblysynyń ákimi Jeńis Qasymbek aralap, qoǵam belsendilerin qonys toiymen quttyqtady.
Kásiptik-tehnikalyq ýchilisheniń bos turǵan ǵimaraty qait túlep, «Dostyq úiine» ainaldy. Ǵimaratta etnomádeni birlestikter, ÚEU, jastar jáne eriktiler uiymdaryna arnalǵan 57 kabinet jabdyqtalǵan. Tipti shyǵarmashylyq jastar úshin arnaiy media stýdiiasy da bar.
Sondai-aq munda túrli ult ókilderi memlekettik tildi úirenip, jetildire alatyn til klýby jumys isteidi. Aldaǵy ýaqytta «Rýhani jańǵyrý» baǵdarlamasy aiasynda mediatsiia kabinetterin ashý josparlanýda.
Igi sharalardyń sońy Temirtaýdaǵy Tuńǵysh Prezidenttiń tarihi-mádeni ortalyǵynda saltanatty is-sharamen jalǵasyn tapty. Sharaǵa Elbasynyń eńbek jolyndaǵy áriptesteri men Táýelsizdiktiń qurdastary qatysty.
– Biyl Táýelsizdiktiń 30 jyldyǵyn qorytyndylai kele, bizdiń elimiz Tuńǵysh Prezidenttiń basshylyǵymen jahandyq tarih úshin qysqa merzim ishinde konomikalyq, saiasi jáne mádeni serpilis jasaǵanyn aiqyn kórýge bolady. Josparly qurylǵan qolaily investitsiialyq ahýaldyń arqasynda aimaǵymyzda jańa tehnologiialardy qoldana otyryp, 100-ge jýyq iri jańa kásiporyndar paida boldy. Shikizat óńirinen biz damyǵan kásipkerlik klasterge deiin óstik. Búginde oblystyń árbir úshinshi turǵyny shaǵyn jáne orta bizneske tartylǵan, – dep atap ótti Jeńis Qasymbek óz sózinde.
Aimaq basshysy sharaǵa qatysqan Elbasynyń eńbek jolyndaǵy áriptesterine alǵysyn bildirdi. Al Nursultan Ábishulymen birge jumys istegen ardagerler tuńǵysh prezidenttiń jastyq shaǵy men Temirtaýǵa saparlary týraly estelikterimen bólisti.
Al jastyq jalyny basyla qoimaǵan Táýelsizdik qurdastary ózderiniń ártúrli salalardaǵy jetistikteri týraly aityp berdi.
