Búginde «Qaraǵandy - Balqash» tasjolynda 360 shaqyrym jol qaita jóndelip jatyr, dep habarlaidy "Ult aqparat".
«Dál qazir «Qaraǵandy - Balqash» tasjolynda turmyz, munda uzyndyǵy 360 shaqyrym jol qaita jóndelip jatyr. Bul tasjol buryn 2 jolaqty bolsa, endi 4 jolaqty bolyp keńeitilýde. Bul joldyń basy Nur-Sultan qalasynan bastalyp, jol jónekei Temirtaý, Qaraǵandy, Balqashqa deiin, odan ári Almatyǵa jalǵasady. Jospar boiynsha jóndeý jumystaryn kelesi jyly aiaqtap, 2022 jyly tolyqtai paidalanýǵa beremiz», - dedi «QazAvtoJol» ulttyq kompaniiasynyń basqarma tóraǵasy Ulan Álip BAQ ókilderine arnalǵan baspasóz týry barysynda.
Onyń aitýynsha, atalǵan baǵyttaǵy joldy jóndeý jumystaryna 2 merdiger kompaniia, 1 myńǵa jýyq tehnika jáne 5 myńdai maman tartyldy.
«Bul jobanyń tiimdiligine kelsek, aldymen jolaýshylar óz ýaqytyn únemdeidi, sondai-aq, Qaraǵandy oblysynyń kólik-logistikalyq áleýetin arttyrady. Odan bólek, kólikpen tasymaldanatyn júk ainalymynyń ulǵaiýymen qatar halyqaralyq tasymaldyń artýyna ákeledi. Atap aitsaq, «Nur-Sultan – Qaraǵandy – Balqash» tasjolyn qaita jańǵyrtý Ózbekstan, Tájikstan, Qytai jáne Resei Federatsiiasyna shyǵý múmkindigin qamtamasyz etedi», - dedi ol.
Ulttyq kompaniia basshysynyń sózine sensek, «Nurly jol» baǵdarlamasy aiasynda biylǵa deiin el kóleminde 13 myń shaqyrym jolǵa jóndeý jumystary júrgizildi. Prezident tapsyrmasyna sáikes, 2025 jylǵa deiin 24 myń shaqyrym jol qaita jóndeletin bolady.
