Qaraǵandy balalar klinikalyq aýrýhanasyna denesi jaraqattalǵan 4 ailyq sábi jetkizildi. Odan birshama aýrý túrleri tabyldy, dep habarlaidy "Ult aqparat".
«Sábi qazir balalar klinikalyq aýrýhanasynyń jansaqtaý bóliminde jatyr. Aýrýhanaǵa túsken kezde onda gematoma túrindegi kóptegen dene jaraqattary boldy. Dárigerler balany tekserip, barlyq qajetti meditsinalyq protsedýralardy júrgizdi. Qyzdan JRVI, tamaǵynyń qabynýy, ishekteriniń durys jumys istemeýi, sondai-aq zár shyǵarý joldarynyń infektsiiasy tabyldy. Balanyń jaǵdaiy jaqsardy, jospar boiynsha ony bólimshege aýystyrýy tiis», - dep túsindirdi Qaraǵandy oblystyq densaýlyq saqtaý bóliminiń baspasóz hatshysy Aijan Isa.
Politsiia qyzdyń denesinde gematomanyń paida bolý sebebin anyqtap jatyr. Óńirlik politsiia departamentinde atalmysh fakti boiynsha qylmystyq is qozǵalǵanyn aitty.
