Óner jolynda júrgen el qairatkerleri Elbasy Nursultan Nazarbaevtyń denine saýlyq tilep, Tuńǵysh Prezidentke jedelhat joldady, dep habarlaidy "Ult aqparat".
"Bizdiń egemen elimizdiń de basty qaǵidasy - tózim men túsinistik. Osy eldi el qylyp, eńsesin kóterip, ishki jáne syrtqy saiasatta dańǵyl jolǵa salǵan Elbasymyz, Qazaqstannyń Tuńǵysh Prezidenti - Nursultan Ábishuly Nazarbaevtyń koronovirýske shaldyqqanyn estip, qapelimde abdyrap qalǵanym ras. Aty jaman indettiń attyń ústinde júrgen azamattardy ainalyp ótpeýi - kez-kelgen adamdy úlken oiǵa jeteleýi de túsinikti shyǵar.
Qurmetti, Nursultan Ábishuly!
El úshin jasap júrgen ulan-ǵaiyr eńbegińizdi, shekaramyzdy bekitýdegi tynymsyz tirligińizdi joǵary baǵalaityn ár qazaq Sizdiń saýyǵyp shyǵýyńyzǵa tilektes! Men de shyn júrekten tilek qosamyn", dedi belgili kompozitor, Qazaqstannyń eńbek sińirgen óner qairatkeri Keńes Dúisekeev.
Osy oraida, tanymal jyraý, Qazaqstannyń eńbek sińirgen qairatkeri Almas Almatov ta tileýlestik bildirdi.
Men Nursultan Ábishulymen Syrdyń ataqty shaiyry Turmaǵambet Iztileýovtiń «Shahnama» dastany aýdarmasy qaita basylyp shyǵarylǵan kezde Qyzylordada kezdesken bolatynmyn. Elbasymyzǵa Turmaǵambettiń eski qadimshe jazylǵan dastannyń qoljazbasyn syilaǵan edik. Sol kezde Elbasymyzdyń óte shiraq, únemi bir qalypta júretindigin baiqaǵanmyn.
Babam qazaq: «Aýyryp turdyń, aýnap turdyń» degendei, dertke shipa tileimin! Aty jaman naýqas artta qalyp, jaqsy kúnge shyǵyp, memlekettiń budan ári de damýyn qara orman elimizdiń Elbasymen birge kórýin násip etsin!", - dedi ol.
