Túrkistanda belgili sazger, Shardara aýdanynyń «Qurmetti azamaty», ánshi Lesbek Amanovtyń ómiri men shyǵarmashalyǵyna arnalǵan «Qara baýyr qasqaldaq» atty mýzykalyq ádebi keshi ótti. Oblystyq mádeniet jáne halyq shyǵarmashylyǵy ortalyǵynyń uiymdastyrýymen «Farab» ǵylymi ámbebap kitaphanasynda ótken keshte sazgerdiń ánderi jinaqtalǵan jańa kitaptyń tusaýy kesildi, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Shyǵarmashylyq kesh «Sozaq» triosy ádemi ánimen bastalyp, Lesbek Amanovtyń mol murasy jaily esteliktermen jalǵasty. Quttyqtaý sóz alǵan Oblystyq mádeniet basqarma basshysynyń orynbasary Asylhan Temirhan: «Lesbek Amanovtyń árbir týyndysy el arasynda keńinen tanylyp, halyq ánine ainalyp ketti desek bolady. Uzaq ýaqyt boiy óńir mádenietine aianbai qyzmet etip, qazaq án ónerine zor eńbek sińirdi. Ómirsheń ánderin nasihattaý bizdiń paryzymyz» – dep, kei ánderiniń shyǵý tarihyna toqtalyp ótti.
Sonymen qatar, Shardara aýdanynyń ákimi Qairat Joldybai men Oblystyq mádeniet jáne halyq shyǵarmashylyǵy ortalyǵynyń basshysy Meiirjan Aliakbarov ta óz sózinde sazgerdiń án álemi men kitaptyń shyǵý barysy jaily aityp ótti, sondai-aq án súier qaýymdy quttyqtady. Sodan soń ziialy qaýymnyń qatysýymen jańa án jinaqtyń tusaýy kesildi. Bul keshti belgili aqyn, termeshi Ábdiǵappar Aidarov júrgizip otyrdy.
Ásem keshte sazgerdiń elimizge tanymal úzdik ánderin oblystan shyqqan óner ieleri oryndap shyqty. Shardara aýdanynyń oblys ortalyǵyndaǵy mádeniet kúnderi aiasynda ótken atalmysh shara maqsaty Túrkistan óńirinen shyqqan tulǵalardyń eńbegin dáripteý arqyly qazaq án ónerine úles qosý jáne el arasynda sazger týyndylaryn keńinen nasihattaý bolyp tabylady.
Aita keteiik, Lesbek Amanovtyń 100-den asa áni bar. Onyń ishinde «Armandastar», «Aq torǵyn», «Sholpanǵa saǵynysh», «Shańyraǵyńdy shaiqaldyrmai saqtap qal», «Dúnie-ai», «Jas kelinniń sálemi», «Áke meiirimi», «Bizder de ǵashyq bolǵanbyz» jáne basqa da ánder bar. Al Jeltoqsan oqiǵasyna bailanysty Esenǵali Raýshanovtyń sózine jazylǵan «Qara baýyr qasqaldaq» áni Lesbek Amanovtyń esimin barsha qazaqqa tanymal etti.
