QR Aýyl sharýashylyǵy ministri Erbol Qarashókeev tamyz aiynda Qazaqstanda qant tapshylyǵy bolmaitynyna sendirdi, dep habarlaidy QazAqparat.
«Ishki naryqta naryqtyq ekonomika jaǵdaiynda satylatyn kommertsiialyq qanttyń jetkilikti kólemi bar ekenin atap ótkim keledi. Jalpy, respýblika boiynsha qant balansy oń saldony kórsetedi. Qańtar aiynan bastap otandyq qant zaýyttary 120 myń tonna qant quraǵynan qant óndirdi. Bul ótken jyldyń uqsas kezeńimen salystyrǵanda 19% artyq. Shilde aiynyń basynda respýblikadaǵy qant qory 27,8 myń tonnany qurady. Aidyń sońyna deiin 37 myń tonna qant óndiriledi dep boljanýda. Kvota sheńberinde import kólemi 33,3 myń tonnany quraidy. Osylaisha, 69,8 myń tonna qajettilik kezinde ishki naryqtaǵy qanttyń jalpy qory - 98,1 myń tonna, naryqtyń qamtamasyz etilýi - shamamen 140%», - dedi Erbol Qarashókeev ortalyq kommýnikatsiialar qyzmetinde.
Aitýynsha, tamyz aiynda elge qajetti qant artyǵymen jetkiziledi.
«Tamyz aiyndaǵy boljamdy qajettilik 69,8 myń tonnany quraidy. Aidyń basynda respýblika boiynsha qanttyń qory – 35,1 myń tonna. Aq qant importy 42,2 myń tonna deńgeiinde bolady kútilip otyr. Qant zaýyttarynyń dereginshe, shamamen 41 myń tonna qant óndirý josparlanǵan. Ákimdikterdiń qoryn eskersek, respýblika boiynsha qanttyń jalpy qory 118 myń tonnany, naryqtyń qamtamasyz etilý deńgeii 169% quraidy. Sonda shilde jáne tamyz ailarynda qant jetkilikti bolady. Biraq ózindik qunynan baǵasy tómen qant jetkiliksiz bolady. Ondai baǵamen satylatyn qant jetkilikti bolmaidy da. Óitkeni ákimdikter kez kelgen ónimdi ózindik qunynan tómen baǵaǵa sata almaidy», - dedi ministr.
Eske salsaq, Úkimettiń keńeitilgen otyrysynda Memleket basshysy Qasym-Jomart Toqaev qant tapshylyǵyn rettei almaǵan Saýda jáne integratsiia ministri Baqyt Sultanov pen Aýyl sharýashylyǵy ministri Erbol Qarashókeevke sógis jariialaǵan edi.
