Foto: Tengrinews.kz/Álihan Sariev
Almaty ákimdigi ǵimaratyn qalpyna keltirý jumystary jalǵasyp jatyr. Onyń qasbeti saqtalady. Bul týraly onlain brifing barysynda Almaty qalalyq qurylys basqarmasy basshysynyń orynbasary Ulan Ońalbaev málim etti, dep habarlaidy QazAqparat.
Spikerdiń sózinshe, Almaty ákimdiginiń ǵimaratyn qaita qalpyna keltirý úshin arnaiy jobalyq-smetalyq qujattama ázirlendi.
«Birinshi kezeńdegi jobalyq-smetalyq qujattama úsh pavilonǵa arnalǵan. Qurylys-montaj jumystarynyń jalpy quny - shamamen 13 mlrd teńge. Eń úlken pavilon tórtinshisi bolmaq. Soǵan sáikes, ekinshi kezeńde jobalyq-smetalyq qujattamany ázirlep jatyrmyz. Qyrkúiek aiynyń sońynda aiaqtaýdy josparlap otyrmyz. Quny qorytyndy shyqqan soń anyqtalady, biraq aldyn ala esep boiynsha 4 mlrd teńge shamasynda. Iaǵni, ǵimaratty jalpy qalpyna keltirýge bizge 17 mlrd teńge qajet», - dedi basqarma ókili.
Sonymen qatar, ol ǵimarattyń qasbeti saqtalatynyn atap ótti.
«Almaty ákimdigi ǵimaratynyń qasbeti barynsha saqtalady, biz burynǵy tarihi kelbetin qaitaramyz. Estetikalyq kórinisti saqtaimyz», — dedi Ulan Ońalbaev.
