Ishki ister ministrliginiń arnaiy mamandary qańtardaǵy tártipsizdikterge qatysy bar adamdardyń tulǵasyn anyqtaý úshin oqiǵa oryndarynda alynǵan saýsaq izderin zerttep jatyr, dep habarlaidy QazAqparat.
Bul jóninde IIM Tergeý departamentiniń bastyǵy Sanjar Ádilov aitty.
«Qazir IIM-niń kriminalisteri alynǵan izder boiynsha qylmyskerlerdiń jeke basyn anyqtap jatyr.
Tergeýshiler 15 myńnan astam tergeý áreketin júrgizdi. Onyń ishinde jábirlenýshilerden, kýálar men kúdiktilerden jaýap alý, bettestirý, qarap-tekserý, tintý jáne taǵy basqa sharalar oryndaldy.
Tergeý organdaryna dáleldemelerdi jinaýǵa jáne quqyq buzýshylardy ustaýǵa kómektesetin azamattarǵa erekshe alǵysymdy bildiremin», - dedi Sanjar Ádilov.
Sondai-aq, quqyq qorǵaý organdaryna osy baǵytta kómek kórsetken almatylyqtardyń batyl áreketine jeke toqtaldy.
«Máselen, Almaty oblysyndaǵy eldi-mekenderdiń birinde turǵyndar urlanǵan qarýdyń 6 danasyn satý áreketiniń jolyn kesip, politsiiaǵa tapsyrdy.
Atalǵan fakti boiynsha sotqa deiingi tergep-tekserý bastalyp, kúdiktiler qamaýǵa alyndy. Olardyń Almatydaǵy áýejai ǵimaratyndaǵy saýda obektilerin tonaýǵa da qatysy bar ekeni anyqtaldy», - dedi IIM ókili.
