Almatyda qańtar aiyndaǵy oqiǵalardan keiin saýda jáne qyzmet kórsetý salasy qaita qalpyna keldi. Birinshi toqsannyń qorytyndysy boiynsha bólshek saýda kólemi - 737,8 mlrd teńge, kóterme saýda ainalymy - 2,4 trln teńgege jetti, dep habarlaidy QazAqparat.
Bul týraly Almaty qalalyq kásipkerlik jáne investitsiialar basqarmasynyń basshysy Erkebulan Orazalin brifingte aitty.
«I toqsannyń qorytyndysy boiynsha Almatynyń ekonomikalyq ósý qarqyny men iskerlik belsendiligi qalpyna kele bastady. Máselen, osy jyldyń 3 aiynda qala 19,18% ósýge qoljetkize otyryp, 248 mlrd teńgeden astam investitsiia tartyldy. Ónerkásip ónimin óndirý kólemi oń serpin kórsetip otyr. I toqsanda Almatyda 387,8 mlrd teńgeniń ónimi óndirilip, 15 paiyzǵa artqan. Óńdeý ónerkásibi 18%-ǵa artqanyn erekshe atap ótý kerek. Bul eń aldymen mashina jasaýdyń belsendi damýyna, iaǵni 1,7 ese ósýine bailanysty», – dedi spiker.
Sonymen qatar, ol qańtardaǵy oqiǵalardan keiin qaladaǵy saýda jáne qyzmet kórsetý salasy da qaita qalpyna kele bastaǵanyn atap ótti.
I toqsannyń qorytyndysy boiynsha bólshek saýda kólemi 737,8 mlrd teńge bolsa, kóterme saýda ainalymy 2,4 trln teńgege jetti.
«Óńirlik komissiia bizneske keltirilgen zalaldy óteýge kirisken bolatyn, búgingi tańda komissiia jalpy somasy 11 mlrd teńgeden astam 1499 ótinimdi maquldady. Zardap shekken kásipkerlerdiń 95 paiyzy ótemaqysyn aldy, qazir olar jumystaryn istep jatyr», – dedi Erkebulan Orazalin.
Qazir komissiianyń qaraýynda saraptama júrgizýdi, JSQ ázirleýdi jáne rastaityn qujattardy qalpyna keltirýdi talap etetin eń kúrdeli jaǵdailar qaldy.
«Bizneske kelgen zalaldy óteý jumystaryn biylǵy jyldyń mamyr aiynda aiaqtaýdy josparlap otyrmyz», - dedi ol.
