Foto: tobolinfo.kz
Qostanai qalasy №2 sotynda qańtar oqiǵasy týraly is boiynsha úkim jariialandy, - dep habarlaidy Tengrinews.kz tilshisi "TobolInfo" saityna silteme jasap.
Tórt sottalýshy - Ámirbek Anýrhanov, Ernazar Ramazan, Damir Abýlov jáne Andrei Býrdiýk 5 qańtarda Qostanaida jappai tártipsizdikke ulasqan sanktsiialanbaǵan mitingke qatysty, sondai-aq, bilik ókiline zorlyq-zombylyq jasady dep aiyptaldy. Sot otyrysy barysynda ekinshi aiyptaý alyp tastaldy.
19 shildede sot zalynda qorǵanys jáne aiyptaý taraptary arasynda is júrgizý kelisimine qol qoiylǵan. Osy kelisim sharttary boiynsha sottalýshylar kinásin tolyq moiyndap, jasaǵan áreketi úshin kópshilik aldynda keshirim surap, sondai-aq, jábirlenýshilerge keltirilgen zalaldy óteidi.
Prokýror taraptardyń jaryssózi kezinde qylmystyq isti jeńildetetin mán-jaidy talap etti. Aita keteiik, sottalýshylar keltirgen zalal ótelgen, ol 399 375 teńge boldy. Onyń ishinde 277 375 teńge - Qazposhtaǵa, 36 myń teńge - Qostanai oblysy Politsiia departamentine jáne 86 myń teńge - Qostanaidyń TKSh bóliminiń qazynasyna túsken.
20 shildede úkim jariialanǵan.
"Qylmystyq is júrgizý kodeksiniń 381-398-baptaryn basshylyqqa ala otyryp, sot Anýrhanov, Ramazan jáne Abýlov pen Býrdiýkti QR Qylmystyq kodeksiniń 271-babynyń 2-bóliginde kózdelgen qylmystyq quqyqbuzýshylyq jasaǵany úshin kináli dep tanyp, Anýrhanov pen Ramazannyń árqaisyna 4 jyl merzimge bas bostandyǵynan aiyrý jazasyn taǵaiyndasyn. Abýlov pen Býrdiýkke 3 jyl taǵaiyndalsyn. QR Qylmystyq kodeksiniń 63-baby negizinde taǵaiyndalǵan jaza sottalǵandarǵa mynadai mindetter boiynsha shartty dep eseptelsin: ýákiletti memlekettik organdarǵa habarlamai turaqty turatyn, jumys isteitin, oqityn jerin ózgertpeý. "Kúzetpen ustaý" bultartpaý sharasy "eshqaida ketpeý týraly qolhatqa" ózgertilsin. Túnde turǵyn úiden shyqpaý, ýákiletti memlekettik organdarǵa habarlamai basqa jerlerge shyqpaý. Sottalǵan Anýrhanov, Ramazan, Abýlov jáne Býrdiýk sot zalyndaǵy qamaýdan dereý bosatylsyn", - dedi sýdia.
Aiyptalýshylardyń qańtardaǵy jappai tártipsizdikke qatysqany is materialdarymen dáleldengen. Protsessýaldyq kelisim zańǵa sáikes keledi, sondyqtan sot ony bekitken. Kiná tolyq moiyndalǵan, sottalýshylar jasaǵan isine ókinedi.
"Anýrhanov pen Ramazanǵa nege Abýlov pen Býrdiýkke qaraǵanda jaza kóbirek taǵaiyndaldy? Anýrhanov pen Ramazannyń tártipsizdikterge qatysy Abýlov pen Býrdiýkke qaraǵanda kóp, sáikesinshe jaza jasalǵan áreketke sáikes keledi", - dep túsindirdi sýdia.
