Foto: Tengrinews.kz
Qańtar oqiǵasyna qatysty Ulttyq qaýipsizdik komitetiniń 11 qyzmetkeri qylmystyq jaýapqa tartylyp jatyr. Bul týraly Májilistiń jalpy otyrysynda QR Ulttyq qaýipsizdik komiteti tóraǵasynyń orynbasary Marat Qalqabaev málim etti, dep habarlaidy QazAqparat.
«Qazirgi kezde Ulttyq qaýipsizdik komitetinde 11 qyzmetker qylmystyq jaýapkershilikke tartylyp jatyr. Keibir ister boiynsha tergeý aiaqtaldy, kináliler qylmystyq jaýapkershilikke tartyldy. Bul (qańtar oqiǵasy boiynsha) qylmystyq qýdalaýǵa bailanysty», - dedi Qalqabaev depýtattardyń suraǵyna jaýap bere otyryp.
Osy oraida spiker qańtar oqiǵasynan keiin komitet quramynda tiisti tekserý júrgizilgenin aitty.
«Sonymen qatar, qańtar oqiǵasynan keiin birden Ulttyq qaýipsizdik komiteti aýqymdy qyzmettik tekseris júrgizdi. Osy oraida buiryq talaptary men qyzmetti atqarý tártibine, onyń ishinde laýazymdy tulǵalardyń jaýapkershiligine qatysty eleýli ózgerister engizildi. Munymen qosa, búgin talqylanyp jatqan zań jobasynda ár qyzmetker is-áreketiniń belgili bir algoritmi men patriotizmdi tárbieleýge baǵyttalǵan tiisti túzetýler kózdelgen», - dedi UQK ókili.
Budan buryn habarlanǵandai, búgin Májilistiń jalpy otyrysynda «Qazaqstan Respýblikasynyń keibir zańnamalyq aktilerine ulttyq qaýipsizdikti qamtamasyz etý jáne Qazaqstan Respýblikasynyń arnaýly memlekettik organdaryndaǵy qyzmet máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy.
