© AP Photo / Vladimir Tretyakov
Almaty qalasy Bostandyq aýdanynyń №2 aýdandyq sotynda Qańtar oqiǵasyna qatysqan 25 azamatqa qatysty qylmystyq is qaraldy, dep habarlaidy "Ult aqparat".
Sot 2022 jyldyń 4-5 qańtary aralyǵynda Almaty qalasynyń túrli bóliginde 25 sottalýshynyń jappai tártipsizdikterge qatysyp, asa iri mólsherde urlyq jasaǵanyn, turǵyn úi, qyzmettik jáne óndiristik úi-jailarǵa zańsyz kirip, iri zalal keltire otyryp kólik quraldaryn aidap áketkenin, qaýipti óndiristik nysanyń aýmaǵyna, sondai-aq arnaiy organdar kúzetetin basqa da nysandarǵa zańsyz kirgenin anyqtady.
"Bul eleýli zalal tigizip, basqa da aýyr zardaptarǵa ákep soqty. Sondai-aq, olar aldyn ala sóz bailasý arqyly oq-dáriler men atys qarýlaryn urlap áketkeni, tótenshe jaǵdai jariialanǵan jerdegi jappai tártipsizdikter kezinde adamdar toby aldyn ala sóz bailasý arqyly bilik ókilderiniń densaýlyǵyna ziian keltirgeni jáne múlkin búldirip, joiǵany anyqtaldy", - delingen Almaty sottarynyń Facebook jelisindegi habarlamasynda.
Jaza taǵaiyndaý kezinde kelesi faktorlar eskerilgen: sottalýshylardyń kinásin tolyq jáne jartylai moiyndaýy, buryn sottalmaǵany, jeke basy, jas mólsheri, quqyqbuzýshylyq jasaǵanǵa deiingi jáne odan keiingi minez-qulqy, kámeletke tolmaǵan balalarynyń bolýy, qylmystyq quqyq buzýshylyqtyń qoǵamdyq qaýpiniń sipaty men dárejesi, qylmystyq quqyq buzýshylyqty tótenshe jaǵdai kezinde jasaýy.
