Foto: Azattyq radiosy
Qańtar oqiǵasyna qatysqan jastardyń kóbi qateligin túsinip, ókinip júr. Bul týraly QR Bas prokýrorynyń birinshi orynbasary Timýr Tájimbaev aitty, dep habarlaidy QazAqparat agenttigi.
«Qańtar oqiǵasy – elimiz úshin úlken qasiret. Ol kúnderi memleket tutastyǵy, Táýelsizdigi men qaýipsizdigi qater aldynda turdy. Prezident der ýaqytta sheshimder qabyldap, elimizdi saqtap qaldy. Memleket basshysy tapsyrmasymen bul oqiǵanyń sebepteri men saldary qaralyp jatyr», - dedi ol Bas prokýratýranyń biylǵy jumysyn qorytyndylaýǵa arnalǵan baspasóz máslihatynda.
Onyń atap ótýinshe, oqiǵanyń basty sebepteri – áleýmettik problemalar, jumyssyzdyq, kiristerdiń azaiǵany. Bul jaǵdaidy destrýktivti kúshter, kriminalitet, radikaldy elementter paidalanyp ketken.
«Olar adamdardy is-júzinde agressiia men qatal áreketterge arandatqan. Tártipsizdik jasaǵan adamdardyń kópshiligi – jastar. Olar áreketteri qandai aýyr saldarǵa ákep soǵatynyn túsinbegen. Kóp jastar óz qatelikterin túsinip, ókinip júr», - dedi Timýr Tájimbaev.
Bas prokýrordyń birinshi orynbasary osyǵan orai qarashada Prezident «Raqymshylyq týraly» Zańǵa qol qoiǵanyn atap ótti.
«Amnistiia bir jarym myń adamǵa qatysty. Qazirgi ýaqytta 991 azamattyń jaza merzimi jeńildedi. 94 adam qylmystyq jaýaptan bosatyldy. Mynany eskere ketsem deimin, tártipsizdik uiymdastyrǵan adamdar, azaptaý, ekstremizm, terrorizm, memleketke opasyzdyq jasaǵandar amnistiiaǵa ilikpeidi», - dedi ol.
