Qańtar oqiǵasyna bailanysty 1 300-den astam meditsinalyq, ballistikalyq jáne basqa sot-saraptamalyq zertteý taǵaiyndaldy. Bul týraly QR Bas prokýratýrasy 1-qyzmet bastyǵynyń orynbasary Eldos Qilymjanov aitty, dep habarlaidy QazAqparat.
«Taǵy da eskertemin, prokýrorlar aryz-shaǵymdar, sonymen qatar internet arqyly taraǵan aqparattardy tekserýde. Quqyq qorǵaý organdary qańtardaǵy oqiǵalardyń búkil mán-jaiyn anyqtaý úshin kóp ýaqytty talap etetin úlken jumys atqarýda. Búgingi kúnde 1 300-den astam meditsinalyq, balistikalyq jáne basqa sot-saraptamalyq zertteý taǵaiyndaldy. Olardyń kóbi - kúrdeli saraptamalar, 2-3 aiǵa deiin sozylýy múmkin. Bul eń aldymen oqiǵa kezinde qaza bolǵan azamattarǵa qatysty mán-jaidy anyqtaý, muqiiat tekserý úshin qajet», - dedi ol ortalyq kommýnikatsiialar qyzmetindegi brifing barysynda.
Onyń atap ótýinshe, tergeýshiler 1500-ǵa jýyq oqiǵa bolǵan oryndy qarap shyqqan.
«10 myńnan astam tergeý amaly júrgizildi. 1 279 tulǵa jábirlenýshi bolyp tanyldy. Atqarylatyn jumys aýqymy óte kóp. Sol úshin tergeý nátijesin kútip, sabyr saqtaý qajet. Tergeý amaldarynyń, saraptama nátijesiniń negizinde ǵana ár kúdiktiniń is-áreketine quqyqtyq baǵa beriledi. Al túpkilikti, iaǵni kinániń bar-joǵy, jazanyń kólemi týraly sheshimdi tek sot qabyldaidy. Sondyqtan qazaqstandyqtardy júrgizilip jatqan jumysqa túsinistikpen qarap, tek resmi málimetterge senýge jáne jalǵan aqparat taratpaýǵa shaqyramyn», - dedi Eldos Qilymjanov.
