Ol adamdardyń jinalýy men qozǵalysy WhatsApp jáne Telegram messendjerleri arqyly úilestirilgenin aitty.
"Birneshe saǵat ishinde bir messendjerde qoldanýshylar sany 140-tan 5 500-ge deiin ósti. Tún ortasynda ákimdik aldyndaǵy ortalyq alańǵa osy atalǵan núktelerden ondaǵan myń adam keldi.
Bul kezde adam kóp jinalyp, alańda ornalasqan ǵimarattardy, múlikterdi, sonyń ishinde turaqqa qoiylǵan avtomobilderdi órtep jiberdi. Búlikke qatysýshylar politsiia qyzmetkerlerine, áskeri qyzmetshilerge shabýyl jasady, joldyń júrý bóligin jaýyp tastady, kólik quraldaryn órtep jiberdi, azamattardy tártipsizdikterge qatysýǵa kóndirdi, tonaý jasady", - dep tolyqtyrdy Bas prokýratýranyń ókili.
Onyń aitýynsha, qylmyskerler qarý-jaraq dúkenderin tonap, urlanǵan qarýdyń kómegimen qasaqana beinebaqylaý kameralaryn joiǵan. Qalada 587 kamera joiylypty, onyń ishinde 283-i - jedel basqarý ortalyǵy jáne 304-i - "Sergek" kesheni, optikalyq bailanys jelileri bar kommýtatsiialyq shkaftar isten shyqqan.
"Halyq arasynda qorqynysh pen úrei týdyrý úshin myńǵa jýyq adamnan quralǵan toptar ákimdik ǵimarattaryn, Prezident rezidentsiiasyn memlekettik biliktiń nyshany retinde jáne qalanyń tynys-tirshiligin jedel basqarý ortalyǵyn maqsatty túrde basyp aldy. Qoǵamdyq qaýipsizdikti jáne quqyqtyq tártipti qamtamasyz etýdi buǵattaý úshin qylmyskerler politsiia organdarynyń ǵimarattaryna shabýyl jasady. Shabýyldyń maqsaty qarý-jaraq, oq-dáriler jáne qorǵanys quraldary bar arsenaldy iemdený boldy", - dedi Eldos Qilymjanov.
Qylmystyq qýdalaý qyzmeti bastyǵynyń orynbasary shabýyl jasaý úshin mańyzdy strategiialyq nysandardyń biri Almaty áýejaiy bolǵanyn atap ótti, onda qylmyskerler ushý-qoný jolaǵynyń jaryqtandyrýyn óshirgen, sodan keiin ǵimarattyń ózin qiratyp, tonaǵan.
"5 qańtarda tústen keiin qalada qylmyskerler Áýezov aýdandyq politsiia basqarmasynyń, sondai-aq Almaly aýdandyq politsiia basqarmasy men bóliminiń ákimshilik ǵimarattaryn basyp alýǵa tyrysty. Sol kúni keshke qarýly shabýylshylar qalalyq politsiia departamentiniń ǵimaratyna shabýyl jasady. Olar ártúrli buryshtan úzdiksiz shabýyl jasady, atys qarýy men jarylǵysh zattardy qoldandy. Politsiia ǵimaratyn qorshaý bir táýlikten astam ýaqytqa sozyldy", - dedi Qilymjanov.
Onyń aitýynsha, qala ákimdigin basyp alǵannan keiin jinalǵandar Prezident Rezidentsiiasynyń ǵimaratyna oiysqan. Shabýyldyń belsendi kezeńi saǵat 15.00-den 16.00-ge deiin bolǵany aitylady.
"Shabýyldaýshylar basyp alynǵan arnaiy tehnikany paidalanyp, ǵimarattyń qorshaýy men qaqpasyn keminde bes ret soqty. Shabýyl kezinde qarý-jaraq dúkenderinen urlanǵan qarý qoldanyldy. Tiri qalqan retinde ákimdikke shabýyl jasaý kezinde tutqynǵa alynǵan áskeri qyzmetshiler paidalanyldy. Qylmyskerlerdiń kópshiligi alkogolge jáne esirtkige mas bolǵan.
Qarańǵylyq pen qalyń tumannyń bastalýymen ǵimaratty qorǵaý múmkin bolmady, óitkeni beibit turǵyndar arasynda qurban bolý qaýpi boldy. Saǵat 19.25-te rezidentsiianyń qorshaýynan KAMAZ mingender basyp kirip, qarýly top ishke kirdi", - dedi Bas prokýratýranyń ókili.
Rezidentsiiany basyp alý, onyń aitýynsha, bilikti qulatý kezeńderiniń biri retinde oilastyrylǵan, óitkeni "mundai ǵimarat pen ákimdikti basyp alý qalanyń memlekettik basqarý júiesinde dúrbeleń týǵyzyp, halyqtyń óz qaýipsizdigi úshin dabyl qaǵýy kerek bolǵan".
"Ákimdik pen Prezidenttiń rezidentsiiasyna jasalǵan shabýyl kezinde qaýipsizdik qyzmetkerleriniń eskertýine qaramastan, qylmyskerler olarǵa atys qarýyn qoldaný qaýpin sezingenimen, ǵimarattarǵa maqsatty túrde shabýyl jasady. Búgingi tańda rezidentsiia ǵimaratyna jasalǵan shabýylǵa toitarys berý kezinde qaza tapqan 12 adam terrorizm aktilerin jasady degen kúdikke ilindi", - dep atap ótti ol.
Almaty boiynsha búlik, ǵimarattardy órteý jáne qarýly shabýyldar nátijesinde keltirilgen shyǵyn 98 milliard teńgege jetti, onyń ishinde 1 592 biznes sýbektisi 92 milliard teńge somasynda zardap shekti.
Quqyq qorǵaý organdarynyń toǵyz qyzmetkeri qaza taýyp, 2 260 adam jaraqat aldy.
"Qylmyskerlerdiń bul áreketteri zań boiynsha terrorizm aktileri retinde saralanady. Almaty qalasynda qańtar oqiǵalary kezeńinde jasalǵan barlyq qylmys boiynsha tergeý organdary 1 066 qylmystyq isti, onyń ishinde 5 is - jappai tártipsizdik, 5 is - terrorizm aktileri boiynsha tergeýde. Sottyń sanktsiiasymen 205 kúdikti qamaýda otyr. Qamaýǵa alynǵan árbir adam boiynsha olardyń qylmysqa qatysy bar ekeni jáne oǵan belsendi qatysýy týraly jetkilikti málimetter bar", - dedi Eldos Qilymjanov.
Sonymen qatar, qalalyq politsiia departamentine úsh shabýyldaýshynyń óliminiń mán-jaiy anyqtaldy. Bas prokýratýra ókilderiniń aitýynsha, 5 qańtarda Almaty oblysynyń eki jáne Shyǵys Qazaqstan oblysynyń bir týmasy politsiia ǵimaratyna qarýly shabýyl jasaǵan.
"Munyń aldynda olar rolderin naqty bólip alǵan, ekeýi avtomatpen qarýlandy, bireýi otty qospany aldy. Óz nietin júzege asyrý úshin olar áskeri júk kóligin alańnan urlap ketip, politsiia departamentiniń ǵimaratyna jetti. Olardyń biri politsiia ǵimaratyna qarama-qarsy kóppáterli turǵyn úidiń tóbesine kóterilip, politseilerge oq jaýdyrdy, sondai-aq óz seriktesterin panalatty. Áskeri kóliktegi taǵy bir seriktes politsiia departamentiniń qaqpasyn buzyp ótýge tyrysty. Úshinshi qatysýshy basqa shabýyldaýshylardy basqardy, olarǵa shabýyl jasaý maqsattaryn belgilep, ǵimaratqa ot laqtyrýǵa tyrysty. Shabýylǵa toitarys berý nátijesinde politsiia qyzmetkerleri úsheýiniń de kózin joidy", - dedi Bas prokýratýra qyzmeti bastyǵynyń orynbasary.
