Prezident tapsyrmalaryn oryndaý úshin Aýyl sharýashylyǵy ministrligi birqatar júieli jáne jedel sharalar qabyldaidy. Bul týraly Aýyl sharýashylyǵy ministri Erbol Qarashókeev aitty, dep habarlaidy QazAqparat.
«Importty almastyrý máselesi keshendi túrde sheshiledi. Jalpy 2022 jyldyń sońyna deiin agroónerkásiptik keshendi damytý boiynsha 295 mlrd teńgege 237 investitsiialyq jobany iske asyrý josparlanyp otyr, onyń ishinde importtalatyn pozitsiialardyń 6 túri boiynsha 128,5 mlrd teńgege 81 joba iske asyrylmaq. Bul úshin osy jobalarǵa jeńildetilgen kredit berý, sýbsidiialaý, jer resýrstary men infraqurylymdy berý qamtamasyz etiledi», - dedi ministr Úkimet úiinde ótken otyrysta.
Onyń aitýynsha, eldi qantpen qamtamasyz etý maqsatynda jańa sýarmaly jerlerdi engizý, sý únemdeitin sýarý tehnologiialaryn engizý, tuqym sharýashylyǵyn damytý, sondai-aq qant qyzylshasyn óńdeitin qolda bar qýattardy tehnikalyq jáne tehnologiialyq qaita jaraqtandyrý, qant zaýyttaryn salý men jańǵyrtý arqyly shikizat bazasyn ulǵaitýdy kózdeitin Qant salasyn damytý jónindegi keshendi jospar ázirlenedi. Tiisinshe, qant salasyn memlekettik retteý men qoldaý sharalary kúsheitiledi.
«Aq qant importynyń jáne quraq qant shikizatynyń óńdeý kólemi ulǵaitylady. Memleket basshysynyń tapsyrmasymen ishki naryqtaǵy baǵalardy turaqtandyrý maqsatynda Saýda jáne integratsiia ministrligimen birlesip, «ainalym shemasy» sheńberinde, onyń ishinde forvardtyq kelisimsharttar tetigin damytý jónindegi jumysty jandandyrý jolymen aýyl sharýashylyǵy taýaryn óndirýshilerdi qarjylandyrýdyń basymdyǵy máselesi pysyqtalatyn bolady», - dedi Qarashókeev.
Keshe Úkimettiń keńeitilgen otyrysynda Memleket basshysy Qasym-Jomart Toqaev qant tapshylyǵyn rettei almaǵan Saýda jáne integratsiia ministri Baqyt Sultanov pen Aýyl sharýashylyǵy ministri Erbol Qarashókeevke sógis jariialaǵan edi.
