"Golden Boy Promotions" promoýterlik kompaniiasynyń prezidenti Erik Gomes ESPN Deportes-ke bergen suqbatynda 15 qyrkúiek kúni "Kanelomen" kezdesetin jańa qarsylas izdeýge resmi túrde kiriskenin málimdedi, dep habarlaidy sputniknews.kz.
Gomestiń bul sózi olardyń Gennadii Golovkinmen kezdesýden bas tartqandaryn bildiredi. Byltyr qyrkúiekte ótken kezdesýde teń tarqasqan qos boksshy biyl dál sol ýaqytta qaita judyryqtasyp, shyn myqtyny anyqtaǵylary kelgen edi. Alaida, jeme-jemge kelgende syiaqy mólsherine kelise almai qaldy. Saýl Alvarestiń (49-1-2, 34 KO) komandasy qazaqstandyqpen ótetin qarymta matchtan túsken tabystyń 65%-yn ózimiz alamyz dep otyr. Al otandasymyzdyń komandasy tabysty teńdei bólsek degen talaptaryn qoidy. Osy máselege kelgende qos taraptyń joly ekige aiyryldy.
Erik Gomes endi orta salmaqtaǵy WBO belbeýiniń iegeri britandyq Billi Djo Sonders (26-0, 12 KO), orta salmaqtaǵy álemniń burynǵy chempiony amerikalyq Deniel Djeikobs (34-2, 29 KO), orta salmaqtaǵy WBC belbeýiniń ýaqytsha chempiony amerikalyq Djermall Charlo (27-0, 21 KO) nemese irlandiialyq Geri O'Sallivan (28-2, 20 KO) jáne kanadalyq David Leme (39-4, 33 KO) qatarly boksshylarmen kelissóz júrgizip jatqanyn aitty.
Ol taǵy Golovkinmen revansh ótkizýge qarsy bolmaǵandaryn, biraq qazaqstandyqtyń sońǵy sátte jónsiz talap qoiǵanyn jetkizdi. Ári GGG ózine unasa, bar bolǵany 12 jekpe-jek ótkizgen, áli eshkim tanymaityn Sergei Derevianchenkomen (mindetti qarsylasy) judyryqtasyp júre bersin dep mysqyldap ta qaldy.
