Meksikalyq boksshy Saýl Kanelo Alvarestiń bapkeri Eddi Reinoso sportshynyń kelesi qarsylasynyń kim bolatynyn aitty, - dep habarlaidy Vesti.kz.
Onyń aitýynsha, Kanelonyń kelesi kezdesýi 3 aidan soń ótýi múmkin.
"Biz 3 aidan keiin kelesi jekpe-jekti ótkizýdi josparlap otyrmyz. Ekinshi orta salmaqta Billi Djo Sonders nemese Kaleb Plantqa qarsy kezdesý ótkizgimiz keledi", - dedi Eddi Reinoso Boxing Social-ǵa bergen suhbatynda.
Sonymen qatar, ol meksikalyq boksshynyń sońǵy jekpe-jegine kóńili tolatynyn atap ótti.
"Men onyń Smitke qarsy ótkizgen kezdesýine kóńilim tolady. Ol shabýyl jasap, jaqsy qorǵana bildi. Men onyń jeńiske jetkenine qýanyshtymyn. Sebebi, biz jeńiske jete bildik. Kanelo salmaq dárejesine qaramastan eń úzdik boksshy ekenine kúmánim joq. Ol sporttyq mansabyn aiaqtaǵan kezde boks tarihyndaǵy eń úzdikterdiń qatarynda bolady", - deidi Eddi Reinoso.
Aita keteiik, WBO chempiony Billi Djo Sonders 4 jeltoqsanda jekpe-jek ótkizgen edi. Ol 3 aidan keiin Kaneloǵa qarsy judyryqtasýǵa daiyn bolýy múmkin. Alaida 30 qańtarda IBF chempiony Kaleb Plant Kaleb Troiǵa qarsy titýlyn qorǵaidy.
Sonymen qatar, Kanelo Golovkinmen 3 ret judyryqtasýǵa qarsy emes ekenin atap ótti.
Eske salaiyq, 2017 jyldyń kúzinde GGG men Kanelo birinshi kezdesýin ótkizip, teń túsken. Al 1 jyldan keiin tóreshilerdiń sheshimimen meksikalyq boksshy jeńiske jetken edi.
