Meksikalyq boksshy Saýl "Kanelo" Alvares (52-1-2, 35 KO) qazaqstandyq Gennadii Golovkinmen (39-1-1, 35 KO) judyryqtasqysy kelmeitinin ashyq aitty. Onyń sózin The Athletic tilshisi Maik Koppindjer Twitter-de jariialady, dep jazady Sputnik.
Alvares bul týraly ortasha aýyr salmaqtaǵy WBO chempiony, reseilik boksshy Sergei Kovalevpen (34-3-1, 29 KO) kezdesýine arnalǵan baspasóz máslihatynda aitqan. "Kanelo" reseilik boksshymen 2 qarashada Las-Vegasta kezdesedi.
"Kanelo" Golovkinmen isi bitkenin jáne onymen úshinshi ret judyryqtasýǵa qulqy joq ekenin aitty", - dep jazdy Koppindjer.
Sondai-aq Alvares óziniń promoýteri Oskara De La Hoiianyń aitqan sózine pikir bildiripti. Buǵan deiin promoýter "Kanelonyń" Golovkinge qarsy jekpe-jegi kelesi jyly bolady degen edi.
"Oskar qaidaǵy-joqty aita berdi", - dedi meksikalyq boksshy.
Eske sala ketsek, Golovkin men Alvares Las-Vegastaǵy kásibi ringte eki ret kezdesti. Olardyń birinshi jekpe-jegi 2017 jyldyń qyrkúieginde tóreshilerdiń sheshimimen teńbe-teń aiaqtalyp, úlken daý-damai týdyrsa, bir jyl buryn meksikalyq boksshy jeńiske jetti. Sóitip qazaqstandyq karerasynda alǵash ret jeńiliske ushyrap, titýldarynan aiyrylyp qalǵan.
GGG ringke 5 qazanda oralady, Niý-Iork qalasynda ýkrain boksshysy Sergeia Derevianchenkomen judyryqtaspaq. Bul jekpe-jektiń jeńimpazy orta salmaqtaǵy IBF jáne IBO chempiondyq belbeýlerin qanjyǵasyna bailaidy.
