Kandidatty deklaratsiiadaǵy 10 teńge aiyrmashylyqqa bola tirkemeý ádiletsizdik. Mundai pikirdi búgin elordada ótip jatqan QR Ortalyq sailaý komissiiasynyń 25 jyldyǵyna arnalǵan halyqaralyq konferentsiiada QR Joǵarǵy sotynyń tóraǵasy Jaqyp Asanov bildirdi, dep habarlaidy QazAqparat tilshisi.
«Sot júiesi sailaý týraly zańnamanyń buzylýyna qatysty kez kelgen naqty fakti boiynsha sheshim qabyldanatyn saty sanalady. Sondyqtan, eń aldymen sailaýǵa qatysty daýlar boiynsha ahýal qandai ekendigin aitpaqpyn. Zań mundai shaǵymdardy qaraýǵa óte tyǵyz ýaqyt bekitken. Eger sailaýǵa daiyndyq júrip jatsa, onda sot 5 kúnniń ishinde qaraýy tiis. Biraq, daýys bergenge deiin bes kúnnen keshiktirilmeýi kerek. Eger daýys bergenge nemese sailaýshylardyń daýysyn sanaýǵa deiingi bes kúnniń ishinde túsetin bolsa, onda sot mundai shaǵymdardy kúnbe-kún qaraýy qajet», - dedi Jaqyp Asanov.
Máselen, onyń dereginshe, 2016 jyly ótken Májilis pen Máslihat sailaýlarynda sotqa 355 shaǵym túsken. Bul 2012 jyly ótken sailaýlardaǵy shaǵymdardan 25 paiyzǵa kem. Degenmen, 2016 jylǵy sailaýlardaǵy shaǵymdardyń 96 paiyzy kandidattardyń deklaratsiialarynda kórsetilgen somada aiyrmashylyq bolýyna bailanysty tirkeýden bas tartýǵa kelispeýmen bailanysty bolǵan.
«Árine, kandidattyń tikelei kinási bolmasa sot shaǵymdy qanaǵattandyrady. Aitalyq, Ońtústik Qazaqstan oblystyq sailaý komissiiasy azamat Áikendi oblystyq máslihatqa qandidat retinde tirkeýden bas tartty. Sot onyń sheshimin joiyp, kandidatty tirketti. Óitkeni, sot qaraýy barysynda salyq organdarynyń aqparaty dáleldenbedi. Sailaý komissiialary deklaratsiiadaǵy aiyrmashylyqqa bailanysty tirkeýden bas tartatyn derekter óte kóp. Árine, áńgime milliondar nemese júzdegen myń teńge tóńireginde bolyp otyrǵan joq. Sóz 100, 10 teńge jaiynda. Mine osyndai bolmashy ǵana soma. Degenmen, zań turǵysynan biz olardy qabyldamaýymyz kerek. Biz muny múldem ádiletsiz dep esepteimiz. Sondyqtan osy turǵyda zań normalaryn naqtylaý qajet», - dedi QR Joǵarǵy sotynyń tóraǵasy.
Osy rette QR Ortalyq sailaý komissiiasynyń tóraǵasy Berik Imashev mundai jaǵdailarda sot onyń durys ne burys ekendiginiń ara jigin ashyp berýge quqyly ekendigin atap ótti.
«Biz normalardaǵy formaldy talaptardy eskeremiz. Sailaý komissiiasy sáikessizdikterge orai sheshim shyǵarý kerek. Bizde túsindirý quqy berilmegen. Eger daýlardyń 96 paiyzy osy sanatqa jatatyn bolsa, onda sailaý komissiialarynyń músheleri zań talaptaryn múltiksiz oryndaidy degen sóz», - dedi Berik Imashev.
Aita keteiik, 2 kúndik halyqaralyq konferentsiia qatysýshylaryna Elbasy Nursultan Nazarbaev, QR Parlamenti Senatynyń tóraǵasy Qasym-Jomart Toqaev quttyqtaý joldaǵan bolatyn.
Alqaly jiynǵa Ázerbaijan, Resei, Latviia, Litva, Tájikstan, Grýziia, Qyrǵyzstan syndy elderdiń Ortalyq sailaý komissiialarynyń tóraǵalary qatysýda.
Konferentsiia aiasynda QR Ortalyq saýlaý komissiiasy men Ázerbaijannyń Ortalyq sailaý komissiiasy jáne Iordaniianyń Táýelsiz sailaý komissiiasy arasynda ózara túsinistik týraly memorandýmǵa qol qoiylmaq.
