Úndistannyń parlamenti talaqpen ajyrasýǵa tyiym salatyn zańdy qabyldady. Endi, mundai áreket qylmystyq is bolyp sanalady, dep habarlaidy Sputnik Times of India basylymyna silteme jasap.
Oppozitsiia qarsy boldy
Basylym taratqan málimetke sáikes, osydan eki jyl buryn Úndistannyń joǵarǵy soty talaqpen ajyrasýdy zańsyz dep tanyǵan. Al úkimet sheshimdi arnaiy qaýlymen rettep keldi. Osy joly parlament talaq aityp ajyrasýǵa zańmen tyiym saldy. Buǵan deiin zań jobasyn tómengi palata maquldaǵan. Joǵary palatada qujatty 99 depýtat qoldasa, 84-i qarsy boldy. Zań jobasy prezidenttiń qol qoiýyna jiberildi.
Úndistannyń oppozitsiiasy bul bastamaǵa qarsy boldy. Joǵary palata depýtaty Gýlam Nabi Azadtyń aitýynsha, talaqpen ajyrasýǵa tyiym salýdyń saiasi astary bar. Sebebi urys-keristiń saldarynan musylman otbasylarynyń shyrqy buzylady. Al ádilet ministri Ravi Shankar Prasadtyń sózine qaraǵanda, buǵan deiin qyzdyń jasaýyn daiyndaý jáne kóp áiel alý siiaqty indýistik salt-dástúrlerge de tyiym salynǵan bolatyn.
Jańa zańǵa sáikes, talaqpen ajyrasqan adamdar úsh jylǵa deiin túrmege qamalady.
Qazaqstanda bul másele qalai retteledi?
Qazaqstanda talaqpen ajyrasý máselesi zańda jazylmaǵan. Onyń negizgi sharttary tek shariǵatpen ǵana retteledi. Qazaqstan musylmandary dini basqarmasynyń shariǵat jáne pátýa bóliminiń mamany Baýyrjan Ábdýálievtiń aitýynsha, talaqty eshbir sebepsiz qoldaný haram bolyp sanalady.
"Talaq "ajyrasý" degen maǵynany bildiredi. Nekeli odaqty shariǵat jolymen buzý degen sóz. Paiǵambarymyz Muhammed (sallallahý aláihi ýá sállám) óziniń bir hadisinde: "Alla taǵalanyń eń jek kóretini ol - talaq" dep kórsetilgen. Sondyqtan eshbir sebepsiz, betaldy "talaq" sózin aitý haram bolyp esepteledi. Adam kúnáhar bolyp qalýy múmkin", - deidi Ábdýáliev.
Onyń sózine qaraǵanda, "talaqty" úsh ret qana aitýǵa ruqsat etilgen. Biraq ony tek qaita jarasyp ketýge bolmaǵan jaǵdaida ǵana qoldanýǵa bolady.
"Erli-zaiyptylardyń arasynda urys-keris toqtamai, jarasýǵa múldem eshqandai múmkindik bolmaǵan kezde ǵana talaqty qoldanady", - dedi Ábdýáliev.
Túrkiianyń diianeti ne deidi?
Ótken jyly Túrkiianyń din isteri jónindegi basqarmasy (diianet) ajyrasýǵa qatysty pátýa shyǵarǵan. Oǵan sáikes, erli-zaiyptylar telefon, faks nemese elektrondy poshta arqyly ajyrasa alady. Ol úshin otaǵasy "talaq" degen sózdi úsh ret aitsa, nemese, jazsa bolǵany.
Budan bólek, taǵy bir pátýa boiynsha er adam áieline "apa, ápke, qaryndas nemese ana" dep aitsa, nekeleri buzylǵan bolyp sanalady.
