Qarjy vitse-ministri Marat Sultanǵaziev jeke azamattardyń bankrottyǵy týraly zań jobasynyń negizgi normalaryn túsindirdi, dep habarlaidy Sputnik Qazaqstan.
"Eger turaqty tabys jáne qaryzdy jabýǵa múmkindik bolmasa, bankrot jariialaý sharasyn qoldaný usynylyp otyr. Onyń eki túri bolady. Birinshisi – sotsyz bankrottyq, ekinshi – sot arqyly bankrottyq jariialaý", - dedi Sultanǵaziev ortalyq kommýnikatsiialar qyzmetinde ótken onlain brifingte.
Sotsyz bankrottyqqa júgine alatyn adamdardyń naqty sanattary anyqtaldy. Olar:
- qaryzdy tóleý merzimi bes jyldan asyp ketkender;
- 100 AEK-ten (306 300 teńgeden) aspaityn bereshekti bir jyl tólemei júrgender;
- 1 600 AEK-ten (4 900 800 teńgeden) aspaityn qaryzdy alty ai tólemegender.
Sotsyz bankrottyqty jariialaý týraly ótinish elektrondy úkimet portaly arqyly jiberiledi. Budan bólek, "E-salyq azamat" mobildi qosymshasy arqyly jiberýge múmkindik bolady.
"Qujat qabyldanǵannan keiin múliktiń bar-joǵy, qaryzdy tóleý merziminiń úsh sanattyń bireýine sáikes kelýi jáne taǵy basqa málimetter tekseriledi", - dep atap ótti vitse-ministr.
Onyń aitýynsha, qaryz kólemi 5 millionnan asatyn boryshkerler bankrottyqty sot arqyly jariialaidy. Múlik bolsa, saýda-sattyq arqyly satylyp, kreditti jabýǵa jiberiledi. Qalǵan qaryzy keshiriledi. Al jalǵyz baspanasyn kepildikke qoimaǵan bolsa, kreditor ony alyp qoia almaidy.
"Osylaisha "bankrot" dep jariialanǵan adamnyń jalǵyz baspanasynan basqa múlki men aqshasy bolmasa, qaryzy keshiriledi. Biraq naqty shekteýler bolady. Atap aitqanda, zań jobasynda bes jyl boiy kredit pen zaim alýǵa tyiym salynyp otyr. Budan bólek, úsh jylǵa elden tys jerge shyǵýǵa ruqsat bolmaidy. Shetelge tek emdelýge, jaqyn týysyn alyp barýǵa jáne jaqyn týysyn jerleýge shyǵýǵa múmkindik beriledi. Jumys isteý úshin de ruqsat berilýi múmkin. Ony áli de talqylaý qajet", - deidi Sultanǵaziev.
Al bankrottyqtan keiingi shekteýlermen júrgisi kelmeitin adamdar qaryzdan birte-birte qutylý tetigin tańdai alady. Ol "tólem qabilettiligin qalpyna keltirý" dep atalady. Ondaida boryshker sotqa júginip, qaryzdy bes jylǵa bólip tóleýdi suraidy. Biraq turaqty tabysy bolýy shart. Al bereshegi 5 million teńgeden asýǵa tiis.
"Sosyn qaryz bergen jáne qaryz alǵan adamnyń kelisimi bolýy shart. Osydan keiin tólem qabilettiligin qalpyna keltirý jospary jasalyp, sotta bekitiledi", - dedi Sultanǵaziev.
Aita keteri, Qazaqstanda jeke tulǵalardyń bankrottyǵy týraly arnaiy zań jobasy ázirlengen bolatyn. Osy aidyń basynda osy qujat qoǵamdyq talqylaýǵa shyǵaryldy. Al 4 aqpanda zań jobasy vedomstvoaralyq komissiianyń otyrysynda qaraldy.
