QR Bas Prokýrorynyń orynbasary Marat Ahmetjanov mas kúiinde kólik tizgindegender jazasy boiynsha jańa erejelerdi túsindirdi, dep habarlaidy QazAqparat.
Spikerdiń aitýynsha, Memleket basshysy qol qoiǵan Qylmystyq, qylmystyq-protsestik zańnamany jetildirý boiynsha QR Zańy arqyly mas kúiinde jol-kólik erejesin buzǵandarǵa jeke bap engizildi.
«Qazan aiynda Almatyda ótken jinalysta Prezident Qasym-Jomart Toqaev mas kúiinde kólik aidaǵandardyń jazasyn kúsheitýdi tapsyrdy. Olardy túrmege otyrǵyzyp, aiyppulyn ósirip, ómir boiyna júrgizýshi kýáliginen aiyrýdy usyndy. Jyl saiyn Qazaqstanda 30 myńǵa jýyq mas júrgizýshi ustalady. Saldarynan bolatyn jol-kólik apatynan biyl myńnan astam adam jaraqat aldy, birazy qaza tapty. Sondyqtan, Qylmystyq kodekske jańa bap (QK 345-1-baby) engizip otyrmyz», - dedi Marat Ahmetjanov QR Prezidenti janyndaǵy Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, búginge deiin alkogoldi ishimdikke mas júrgizýshi men saý júrgizýshilerge ortaq bir norma qoldanylyp kelgen. Buǵan deiin mas júrgizýshige 2 jylǵa júrgizýshi kýáliginen aiyrý men 40 kúndik qamaý jazasy qarastyrylsa, endi olar 1 jyldan 10 jylǵa deiin bas bostandyǵynan aiyrylýy múmkin.
«Ishimdikke mas júrgizýshi kesirinen adam ólimi oryn alsa, aýyr qylmys sanalady jáne taraptardyń ymyraǵa kelýine tyiym salynady. Aiypty adam 10 jylǵa deiin abaqtyǵa qamalyp, ómir boiyna júrgizýshi kýáliginen aiyrylýy múmkin», - dedi M. Ahmetjanov.
Aita keteiik, Marat Ahmetjanov elimizdegi qylmys ahýaly týraly, sondai-aq qylmystyq, qylmystyq-protsestik zańnamany jetildirý boiynsha QR Zańynyń negizgi novellalary týraly aityp berdi. Atalǵan zańǵa QR Prezidenti 2019 jyldyń 28 jeltoqsanynda qol qoidy jáne ol 2020 jyldyń 1 qańtarynan bastap kúshine enedi.
