Qazaqstanǵa kóship keletin etikalyq qazaqtardyń azamattyq alýǵa qujattaryn qaraý merzimi 6 aidan 3 aiǵa deiin qysqartylady. Bul jaiynda Senat depýtattarynyń resmi saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«2016 jyldan bastap 2020 jylǵy aqpan aralyǵynda Qazaqstanda turǵylyqty turýǵa 101 375 adam kóship keldi. Onyń ishinde etnikalyq qazaqtar 57 773 adamdy quraidy. Olar kóbinese Reseiden, Ózbekstannan, Qytaidan jáne Qyrǵyzstannan kóship kelgen. Sheteldegi etnikalyq qazaqtardy tarihi otanyna tartý jáne olardy elimizdiń ishinde beiimdeý maqsatynda memlekettik organdardyń tarapynan mynadai jumystar júrgizilýde: 2019 jylǵy 15 qarashada etnikalyq qazaqtardyń tarihi otanyna kelgende qajetti memlekettik qyzmetterdi bir qujattar tizbesimen elektrondyq formatta alýyna múmkindik beretin «bir tereze» qaǵidaty boiynsha biznes-protsesterdi ońtailandyrý jónindegi jol kartasy bekitildi. Onyń aiasynda oralman mártebesin, el aýmaǵynda turaqty turýǵa ruqsat jáne QR azamattyǵyn alý siiaqty memlekettik qyzmetterdi kompozittik túrde usyný kózdeldi», - dedi Úkimet basshysy.
Onyń atap ótýinshe, QR Parlamenti Senatynda «Qazaqstan Respýblikasynyń keibir zańnamalyq aktilerine kóshi-qon protsesterin retteý máseleleri boiynsha ózgerister men tolyqtyrýlar engizý týraly» Zań jobasy qaralyp jatyr. Atalǵan Zań jobasy aiasynda azamattyq alýǵa qujattardy qaraý merzimi 6 aidan 3 aiǵa deiin qysqartý qarastyrylǵan. Sonymen qatar, ákimshilik quqyq buzýshylyqtar jasaǵan etnikalyq qazaqtarǵa Qazaqstan Respýblikasynda turaqty turýǵa shekteýsiz ruqsat berý kózdeldi.
«Sonymen qatar, etnikalyq qazaqtar oralman mártebesin alǵan jaǵdaida Qazaqstan Respýblikasy azamattaryna kózdelgen barlyq áleýmettik qoldaýlarǵa qol jetkize alady. Bul baǵyttaǵy maqsat – qandastarymyzdy qoǵamǵa beiimdeý, áleýmettik qorǵaý jáne teń jaǵdai jasaý bolyp tabylady», - dedi Asqar Mamin.
