Búgin jańa oqý jylynyń bastalýyna orai QR Energetika ministri Qanat Bozymbaev Almaty qalasyndaǵy ózi oqyǵan 83 mektep-gimnaziiada saltanatty sharaǵa qatysty, dep habarlaidy "Ult aqparat".
Ministrliktiń baspasóz qyzmetinen málim etkendei, shara barysynda Q.Bozymbaev alǵashqy ustazdarymen júzdesip, ardager pedagogtardy, 1-synyp tabaldyryǵyn attaǵan oqýshylardy Bilim kúnimen quttyqtady.
Sonymen qatar, «Sanaly urpaq - jarqyn bolashaq» atty ashyq sabaqqa qatysyp, joǵary synyp oqýshylarymen suhbat qurdy. Ol balalyq estelikterimen bólisip, arman-maqsat týraly taqyrypta áńgimelesken.
«Mektep bitirgenimizge qansha jyl ótse de, qansha eseiip, azamat bolsaq ta, osy mektep bizdiń eń alǵashqy altyn uiamyz sekildi ystyq kórinip turady», - dedi ministr.
Vedomstvo basshysy ár synypty jeke aralap, 33 jyl buryn tálim bergen muǵalimderimen áńgimelesken.
Aita keteiik, Qanat Bozymbaev atalǵan mekteptiń 1986 jylǵy túlegi. Ministrliktiń baspasóz qyzmeti onyń oqýshy kezindegi fotosýretterimen bólisti.
