Bokstan Qazaqstan ulttyq quramasynyń kapitany Qamshybek Qońqabaev kásipqoi boksta baq synaityn boldy, dep habarlaidy "Ult aqparat".
Bul jóninde MTK Kazakhstan menedjerlik kompaniiasynyń Instagram paraqshasynda habarlandy.
«MTK Kazakhstan bokstan Qazaqstan quramasynyń kapitany Qamshybek Qońqabaevpen kelisim-shart jasalǵanyn qýanyshpen habarlaidy», - dep jazylǵan atalmysh paraqshada.
Eske sala ketsek, Qamshybek Tokio Olimpiadasyna 91 keli salmaqta joldama jeńip alǵan bolatyn. Sondyqtan bylǵary qolǵap sheberiniń aldaǵy ýaqytta dúbirli dodada baq synaýyna múmkindigi bar.
Aita keterligi, ol mundai básekede tuńǵysh márte sharshy alańǵa shyǵady.
Qamshybek Qońqabaev 1991 jyly 18 qarashada Qyzylorda qalasynda dúniege kelgen. Ol - Qazaqstannyń birneshe dúrkin chempiony. Álem (2017, 2019) jáne Aziia chempionattarynda (2017, 2019) eki-eki márte kúmis júldeger atandy.
