"Qamaýda qalyp, qyr jaǵalap ketken" aýyl jurty sońǵy 5 aida kórgen azaptan ábden sharshady. Almaty oblysyndaǵy Qyzylqairat aýylynyń turǵyndary jolǵa zárý, dep habarlaidy Almaty.tv tilshisi.
Turǵyndar aýlasyna jetýi úshin birneshe úidi ainalyp baram degenshe demi bitip, kórshiniń qorasynda entigin basýǵa týra keledi. Sebebi buryn qatynap júrgen joldaryn ózge bireý jaýyp tastaǵan.
«Jan jaǵymyzdy qorshap tastap, «zonada» otyrǵan siiaqtymyz. Qazir ǵana Qyzylqairattyń ortalyǵyndaǵy ýkol salatyn jerden sistemamdy alyp kelip otyrmyn. Jaiaý. Myna úidiń ortasymen ótip, myna jerge demalyp alyp, odan bylai qarai úiime barý úshin sharbaqtyń arasynan ótýim kerek», – deidi Qyzylqairat aýylynyń turǵyny Álipa Ádilbekova.
«Árkimniń esiginiń aldynan ótemiz. Olarǵa da jekkórinishti boldyq. Bireýi it bailap qoiady. Olar da jaqtyra bermeidi», – dedi Qyzylqairat aýylynyń turǵyny Satybaldy Qydyruly.
Turǵyndardyń aitýynsha, buryn ashyq turǵan jol 5 ai buryn jabylǵan. Sebebi ol jaqqa jerdiń ieleri kelip, qorshap alypty. Sondyqtan jurt kórshiniń qabaǵy men úrgen itinen tyǵylyp, keide qyr jaǵalap ketetin kórinedi.
Al aýyl men aýdan ákimdiginiń ókilderi halyqtyń jaǵdaiymen tanys. Biraq olarmen kezdesýden bas tartty.
«Jekemenshik jer bolǵandyqtan, jer iesi bermeimin dep joldy jaýyp otyr. Máseleniń aq-qarasy osy. Ekinshiden, jol ashý ne burynǵy ótip júrgen joldyń iesimen sóilesemiz. Bizdiń zańgerler men mamandar sóilesip jatyr. Aýdannyń arhitektor bólimi men jer kadastry bólim mamandary da jumys júrgizip jatyr», – dedi Alataý aýyldyq okrýginiń ákimi Azamat Seiitov.
Jol máselesi eldi mekenniń kelesi betindegi turǵyndarǵa da arman bolyp otyr. Tipti, kei turǵyn óz qaltasynan qunyn tólep, tas tósetken. Biraq oiqy-shoiqy jol adam aiaǵyn syndyryp, kólikti tozdyryp bitken.
«Aýyrǵan kezde, balalar qorqyp ketip, jedel járdem kóligin shaqyrdyq. Ol kelmeidi», – dedi Qyzylqairat aýylynyń turǵyny Kúldáriia Kenjebaeva.
«Mashinalarymyz shashylyp qalyp jatyr. Jasaý múmkin emes. Al endi qymbat kólik alýǵa jaǵdaiymyz joq», – dedi jergilikti turǵyn Baýyrjan Júnisov.
Aýyl ákimi jol salýǵa qarajat kútip otyrǵan kórinedi.
«Taiaý arada jumysyn bastaidy. Konkýrs oinatylyp boldy. Utyp alǵan merdiger anyqtaldy. Qazirgi tańda jumys júrgiziledi. Hasanov kóshesine 940 metrge jol tóseledi. Al myna jerge asfalt tóselmeidi. Tas tóseidi», – dedi Alataý aýyldyq okrýginiń ákimi Azamat Seiitov.
Tas jol tóseledi. Biraq ýájin aitqan halyqtyń kóshesine emes. Ákimniń aitýynsha, aýmaqta áli de úiler salynyp jatqandyqtan, jol salýǵa deiingi jumystar bar.
Aita ketsek, Alataý aýyldyq okrýgindegi 16 myńnan astam halyqtyń jartysy dál osy Qyzylqairat aýylynda turady.
